મુંબઈ: CJIના કથિત વિરોધમાં બનીને સોશિયલ મીડિયા પર રાતોરાત કરોડો ફોલોઅર્સ મેળવનારી વર્ચ્યુઅલ પાર્ટી ‘કોકરોચ જનતા પાર્ટી’ (CJP) મુશ્કેલીમાં મુકાઈ છે. પાર્ટીએ આજે સવારે સત્તાવાર રીતે જાહેરાત કરી છે કે તેનું મુખ્ય ઇન્સ્ટાગ્રામ એકાઉન્ટ હેક થઈ ગયું છે.
X (ટ્વિટર) પર પોસ્ટ કરીને આપી માહિતી
કોકરોચ જનતા પાર્ટી દ્વારા શનિવારે સવારે સોશિયલ મીડિયા પ્લેટફોર્મ X પર એક પોસ્ટ શેર કરવામાં આવી હતી. આ પોસ્ટમાં જણાવવામાં આવ્યું હતું કે, "પાર્ટીનું ઇન્સ્ટાગ્રામ એકાઉન્ટ હેક થઈ ગયું છે અને વહીવટી ટીમ હવે તેને એક્સેસ કરી શકતી નથી." જોકે, રાહતની વાત એ છે કે સામાન્ય યુઝર્સ હજુ પણ આ એકાઉન્ટ અને તેના પરની પોસ્ટ્સ જોઈ શકે છે, પરંતુ તેના પર કંટ્રોલ હેકર્સનો હોવાની આશંકા છે.
હેકિંગ વચ્ચે પણ ફોલોઅર્સનો નવો રેકોર્ડ
આ વિવાદ અને હેકિંગના સમાચારો વચ્ચે પણ કોકરોચ જનતા પાર્ટીની લોકપ્રિયતા સતત વધી રહી છે. ઇન્સ્ટાગ્રામ પર CJP ના ફોલોઅર્સનો આંકડો હવે ૨ કરોડ ૧૭ લાખ (2.17 Crore) ને પાર પહોંચી ગયો છે. બીજી તરફ, માઇક્રોબ્લોગિંગ સાઇટ X પર પણ પાર્ટીના ફોલોઅર્સની સંખ્યા શનિવારે સવારે ૯:૪૫ વાગ્યા સુધીમાં ૧ લાખ ૯૪ હજારથી વધુ થઈ ગઈ છે. હવે જોવાનું એ રહેશે કે માત્ર ૬-૭ દિવસમાં કરોડો ડિજિટલ સમર્થકો મેળવનારી આ અનોખી પાર્ટી પોતાનું ઇન્સ્ટાગ્રામ એકાઉન્ટ ક્યારે રિકવર કરી શકે છે.
