માન્ચેસ્ટર ટેસ્ટમાં ભારતીય બોલરોની હાલત ખરાબ ત્રીજા દિવસે, ઇંગ્લેન્ડે બોલરોને આડે હાથ લીધા

માન્ચેસ્ટરના ઓલ્ડ ટ્રેફોર્ડ ખાતે રમાઈ રહેલી ચોથી ટેસ્ટમાં ઈંગ્લેન્ડે પોતાની પકડ મજબૂત બનાવી લીધી છે. બીજા દિવસે ભારતીય ટીમનો પહેલો દાવ 358 રન પર સમાપ્ત થયો હતો. જવાબમાં, ઈંગ્લેન્ડે ત્રીજા દિવસની રમતના અંત સુધીમાં 7 વિકેટે 544 રન બનાવી લીધા હતા. યજમાન ટીમે હવે ભારત પર 186 રનની લીડ મેળવી લીધી છે અને તેમની પાસે હજુ પણ ત્રણ વિકેટ બાકી છે. ભારતના નામે એક અનિચ્છનીય રેકોર્ડ; હકીકતમાં, છેલ્લા 10 વર્ષમાં આ પહેલી વાર છે જ્યારે કોઈ ટીમે વિદેશી ધરતી પર ભારત સામે ટેસ્ટની એક ઇનિંગમાં 500 થી વધુ રન બનાવ્યા છે. જાન્યુઆરી 2015 ની શરૂઆતમાં, ઓસ્ટ્રેલિયાએ સિડની ટેસ્ટમાં 572/7 રન બનાવીને ઇનિંગ ડિકલેર કરી હતી, જેમાં ડેવિડ વોર્નર અને સ્ટીવ સ્મિથની સદીઓનો સમાવેશ થતો હતો. તે મેચ પછી, આ પહેલી વાર છે જ્યારે કોઈ ટીમે વિદેશી ધરતી પર ભારત સામે 500+ રનનો આંકડો પાર કર્યો છે.