મહારાષ્ટ્રમાં ચોમાસાની અસર અનુભવાવા લાગી છે. ગઈકાલ રાતથી મુંબઈમાં ભારે વરસાદ પડી રહ્યો છે. મુંબઈના પશ્ચિમી ઉપનગરોમાં ૧૯૦ મીમી વરસાદ પડી ચૂક્યો છે. ભારતીય હવામાન વિભાગ (IMD) ના મુંબઈ પ્રાદેશિક કેન્દ્રે બુધવારે વહેલી સવારે મુંબઈ અને પાલઘર માટે રેડ એલર્ટ જારી કર્યું હતું. મુંબઈ અને આસપાસના વિસ્તારોમાં વાવાઝોડા અને વીજળી સાથે ભારે વરસાદની ચેતવણી જારી કરવામાં આવી છે.
મહારાષ્ટ્રના વિવિધ ભાગોમાં વરસાદ પડી રહ્યો છે. ભારે વરસાદને કારણે મુંબઈ ઠપ્પ થઈ ગયું છે. હિંદમાતા, માટુંગા, કુર્લા અને અંધેરી સહિત અનેક નીચાણવાળા વિસ્તારો પાણીમાં ગરકાવ થઈ ગયા છે.
દરમિયાન, આજે જારી કરાયેલી ચેતવણીમાં જણાવાયું છે કે મહારાષ્ટ્રના ઘણા જિલ્લાઓમાં વીજળી, વાવાઝોડા અને ભારે વરસાદની સંભાવના છે. મુંબઈ સ્થિત ભારતીય હવામાન વિભાગ (IMD) એ જણાવ્યું હતું કે 40-60 કિલોમીટર પ્રતિ કલાકની ઝડપે પવન ફૂંકાઈ શકે છે.
