'બસ બહુ થયું... હવે બંધ કરો', યુએન ચીફની અમેરિકા, ઇઝરાયલ અને ઈરાનને અપીલ, યુદ્ધ બંધ કરવા કહ્યું

પશ્ચિમ એશિયામાં ચાલી રહેલ યુદ્ધ સમગ્ર વિશ્વ માટે ચિંતાનો વિષય છે. આ સંઘર્ષમાં મુખ્ય વૈશ્વિક ઉર્જા કેન્દ્રોને નિશાન બનાવવામાં આવ્યા છે. સંઘર્ષના પરિણામે, વિશ્વભરના ઘણા દેશો ગંભીર ઉર્જા સંકટનો સામનો કરી રહ્યા છે. સંયુક્ત રાષ્ટ્રએ ફરી એકવાર પરિસ્થિતિ વધુ વણસે તે પહેલાં આ યુદ્ધ બંધ કરવાની અપીલ કરી છે. યુએન સેક્રેટરી-જનરલ એન્ટોનિયો ગુટેરેસે અમેરિકા અને ઇઝરાયલને ઈરાન યુદ્ધનો અંત લાવવા અને તેહરાનને ગલ્ફ દેશો પર હુમલા બંધ કરવા વિનંતી કરી. તેમણે કહ્યું, "બસ હવે બહુ થયું... બંધ કરો. આ તો નેતાઓએ કલ્પના કરેલી મર્યાદાઓ પણ વટાવી ગયું છે." બુધવારે જારી કરાયેલા એક નિવેદનમાં, તેમણે કહ્યું કે ગયા મહિને થયેલા સંયુક્ત હુમલાથી ઈરાન સામે યુદ્ધ શરૂ થયું. ચાલુ સંઘર્ષના કારણે માનવ દુઃખ, નાગરિકોના મૃત્યુ અને વિશ્વભરમાં વિનાશક આર્થિક અસર વધી રહી છે. "ઈરાનને મારો સંદેશ છે કે તમારા પડોશીઓ પર હુમલો કરવાનું બંધ કરો," ગુટેરેસે ઉમેર્યું. તેમણે સંઘર્ષને ઉકેલવા માટે વિશ્વ સંસ્થાના પ્રયાસો અને તાજેતરના શાંતિ પ્રયાસોનું નેતૃત્વ કરવા માટે એક વ્યક્તિગત દૂતની નિમણૂકની પણ જાહેરાત કરી. યુએન સેક્રેટરી-જનરલનું આ નિવેદન એવા સમયે આવ્યું છે જ્યારે બુધવારે ઈરાને પશ્ચિમ એશિયામાં યુદ્ધવિરામ માટેના અમેરિકાના પ્રસ્તાવને નકારી કાઢ્યો હતો અને ઈઝરાયલ અને ખાડી દેશો પર હુમલાઓ વધારી દીધા હતા. યુદ્ધવિરામના પ્રસ્તાવ છતાં, ઈરાને કુવૈત આંતરરાષ્ટ્રીય એરપોર્ટને પણ નિશાન બનાવ્યું હતું, જેના કારણે ભારે આગ લાગી હતી. ઈઝરાયલે તેહરાન પર હવાઈ હુમલા શરૂ કર્યા હતા, અને અમેરિકાએ પેરાટ્રૂપર્સ અને મોટી સંખ્યામાં મરીન તૈનાત કર્યા હતા.