ધુમાડાના ગોટેગોટા દૂર સુધી દેખાયા, ફાયર ટીમો દોડી આવી
પાલનપુર તાલુકાના ચંડીસર GIDC વિસ્તારમાં આવેલી વીજ D.P. બનાવતી ફેક્ટરીમાં બુધવારે અચાનક ભીષણ આગ લાગતાં ભારે અફરા તફરીનો માહોલ સર્જાયો હતો. જણાવ્યા મુજબ ફેક્ટરીમાં વીજ D.P. ધડાકાભેર ફાટ્યા બાદ આગે વિકરાળ સ્વરૂપ ધારણ કર્યું હોવાનું જાણવા મળ્યું છે.
આગ લાગતાની સાથે જ ફેક્ટરીમાંથી કાળા ધુમાડાના ગોટેગોટા આકાશમાં ઉઠવા લાગ્યા હતા. જે દૂર સુધી નજરે પડતા હતા. ઘટનાને પગલે આસપાસના લોકોમાં પણ ભારે ચકચાર મચી ગઈ હતી. આગની ઘટનાનો વીડિયો સોશિયલ મીડિયામાં વાયરલ થયો છે.
ઘટનાની જાણ થતાં ફાયર વિભાગની ટીમો તાત્કાલિક ઘટનાસ્થળે પહોંચી હતી અને આગ પર કાબૂ મેળવવાની કામગીરી હાથ ધરી હતી. જોકે, આગ કયા કારણોસર લાગી તે અંગેનું ચોક્કસ કારણ હજુ અકબંધ છે. પ્રાથમિક તબક્કે ઘટનામાં કોઈ જાનહાનિ થઈ હોવાની માહિતી સામે આવી નથી. જોકે, ફેક્ટરીમાં રહેલા માલસામાન અને સાધન સામગ્રીને નુકસાન થયું હોવાની શક્યતા છે. આગ સંપૂર્ણપણે કાબૂમાં આવ્યા બાદ જ નુકસાનની વાસ્તવિક સ્થિતિ સ્પષ્ટ થશે.
