અભિનેતા ટાઇગર શ્રોફના શૂટિંગ અંગે મોટા સમાચાર સામે આવી રહ્યા છે. એન્ટિ-ગેંગસ્ટર ટાસ્ક ફોર્સ અને રાજસ્થાન પોલીસે રાજસ્થાનના કોટા રેલ્વે સ્ટેશન પરથી ત્રણ લોકોની ધરપકડ કરી છે. આરોપીઓ (12939) પુણે-જયપુર સુપરફાસ્ટ એક્સપ્રેસમાં ઝડપાયા હોવાનું જાણવા મળ્યું છે. કોટા પોલીસે જણાવ્યું હતું કે ત્રણેય આરોપીઓ નેપાળ ભાગી જવાની યોજના બનાવી રહ્યા હતા. રેહાન મુખ્ય આરોપી હતો, જેણે બાદમાં અન્ય બેનો સંપર્ક કર્યો હતો. આ વ્યક્તિઓ અનિલ પંડિતના સંપર્કમાં હતા , જે લોરેન્સ બિશ્નોઈ ગેંગ સાથે સંકળાયેલ છે.
આ ત્રણેય આરોપીઓ ટાઇગર શ્રોફના શૂટિંગ પછીથી ફરાર હતા. એવું પણ જાણવા મળ્યું છે કે ફરાર આરોપીઓમાંથી એક બિહારનો છે, જ્યારે બે હરિયાણાના છે. આરોપીઓને કોટા કોર્ટમાં રજૂ કરવામાં આવશે, ત્યારબાદ મુંબઈ ક્રાઈમ બ્રાન્ચ તેમને ટ્રાન્ઝિટ રિમાન્ડ પર લેશે. મુંબઈ ક્રાઈમ બ્રાન્ચની એક ટીમ કોટા પહોંચી ગઈ છે.
રવિવારે સાંજે મુંબઈના જુહુ વિસ્તારમાં ત્રણ અજાણ્યા હુમલાખોરોએ અભિનેતા ટાઈગર શ્રોફ પર હુમલો કર્યો હતો. તે પોતાની કાર ચલાવી રહ્યો હતો ત્યારે નજીકથી ગોળીબાર કરવામાં આવ્યો હતો. જોકે ટાઈગર શ્રોફ આ હુમલામાં બચી ગયો હતો, પરંતુ તેના ડ્રાઈવર સહિત બે લોકો ઘાયલ થયા હતા. મુંબઈ પોલીસે જણાવ્યું હતું કે ટાઈગર શ્રોફ સુરક્ષિત છે અને ઘટનાની તપાસ ચાલી રહી છે. અહેવાલો અનુસાર, ટાઈગર શ્રોફની કાર પર સાત રાઉન્ડ ગોળીબાર કરવામાં આવ્યો હતો. ઘટના બાદથી ફરાર આરોપીઓને હવે કોટા રેલ્વે સ્ટેશન પરથી પકડવામાં આવ્યા છે.
આ ઘટનાના થોડા સમય પછી, લોરેન્સ બિશ્નોઈ ગેંગે જવાબદારી સ્વીકારી. ગેંગ સાથે સંકળાયેલા ગેંગસ્ટર અનિલ પંડિત અને હરમન સંધુએ આ હુમલાની જવાબદારી સ્વીકારી હોવાનું કહેવાય છે. અગાઉ, અનિલ પંડિતનું નામ અનેક ગોળીબાર અને હુમલાઓમાં સામે આવ્યું છે. તે દિલ્હીમાં ગુરુ રંધાવા સાથે સંકળાયેલા જીમમાં ગોળીબારમાં પણ દેખાયો હોવાના અહેવાલ છે. આ ઘટનામાં ટાઇગર શ્રોફનો ડ્રાઇવર અને રિક્ષાચાલક પણ ઘાયલ થયા હતા. ગોળીબારનો એક વીડિયો પણ સામે આવ્યો છે, જેમાં આરોપીઓ ટાઇગર શ્રોફની કાર પર અનેક રાઉન્ડ ફાયરિંગ કરતા દેખાય છે. જોકે, ઘટના બાદ આરોપીઓ ઘટનાસ્થળેથી ભાગી ગયા હતા.
