ઓસ્ટ્રેલિયા બાદ હવે ઇંગ્લેન્ડ માટે ખરાબ સમાચાર, સ્ટાર ખેલાડી એશિઝમાંથી બહાર

એશિઝ 2025: એશિઝ 2025 માં બે ટેસ્ટ મેચ રમાઈ છે , અને ઓસ્ટ્રેલિયાએ બંનેમાં જીત મેળવી છે. ઓસ્ટ્રેલિયાએ બંને મેચમાં ઈંગ્લેન્ડને 8 વિકેટથી હરાવ્યું છે. હવે બંને ટીમો ત્રીજી એશિઝ ટેસ્ટમાં ટકરાવવા માટે તૈયાર છે. ત્રીજી ટેસ્ટ 17 ડિસેમ્બરે એડિલેડમાં શરૂ થશે. આ મેચ પહેલા, 9 ડિસેમ્બરે ઓસ્ટ્રેલિયા માટે ખરાબ સમાચાર આવ્યા. ફાસ્ટ બોલર જોશ હેઝલવુડ બાકીની ત્રણ એશિઝ ટેસ્ટમાંથી બહાર થઈ ગયા. આ સમાચારના થોડા કલાકો પછી, ઈંગ્લેન્ડને પણ મોટો ફટકો પડ્યો. ઈંગ્લેન્ડના ફાસ્ટ બોલર માર્ક વુડ ઓસ્ટ્રેલિયા પ્રવાસમાંથી બહાર થઈ ગયા છે. પર્થમાં રમાયેલી પહેલી ટેસ્ટ દરમિયાન વુડને ડાબા ઘૂંટણમાં ઈજા થઈ હતી અને ફરી એકવાર ઈજા થવાથી તે એશિઝની બાકીની મેચોમાંથી બહાર થઈ ગયો છે. વુડ આ અઠવાડિયાના અંતમાં ઈંગ્લેન્ડ પરત ફરશે જ્યાં તે ECB મેડિકલ ટીમની દેખરેખ હેઠળ પોતાની રિકવરી અને રિહેબિલિટેશન ચાલુ રાખશે. દરમિયાન, ઇંગ્લેન્ડ અને વેલ્સ ક્રિકેટ બોર્ડ (ECB) એ ઝડપી બોલર મેથ્યુ ફિશરને સિનિયર ટીમમાં ઉમેર્યો છે. ફિશર તાજેતરમાં ઇંગ્લેન્ડ લાયન્સ સાથે ઓસ્ટ્રેલિયામાં હતો અને હવે એશિઝ શ્રેણીના બાકીના મેચો માટે ટેસ્ટ ટીમમાં જોડાશે. મેથ્યુ ફિશર ઓસ્ટ્રેલિયાની ધરતી પર બોલ સાથે કેટલો અસરકારક સાબિત થાય છે તે જોવું રસપ્રદ રહેશે. ૨૮ વર્ષીય મેથ્યુ ફિશરે ઈંગ્લેન્ડ માટે એક ટેસ્ટ મેચ રમી છે. ફિશરે ૨૦૨૨માં વેસ્ટ ઈન્ડિઝ સામે બ્રિજટાઉનમાં ટેસ્ટ ડેબ્યૂ કર્યું હતું, તે મેચમાં તેણે એક વિકેટ લીધી હતી. હવે, લગભગ ત્રણ વર્ષ પછી, તેની પાસે ટેસ્ટ ક્રિકેટમાં પાછા ફરવાની શાનદાર તક છે. તેણે હવે ૫૬ ફર્સ્ટ-ક્લાસ મેચોમાં ૨૮.૧૬ ની સરેરાશથી ૧૭૫ વિકેટ લીધી છે.