દેશના અનેક રાજ્યોમાં મુશળધાર વરસાદથી તબાહી મચી ગઈ છે. આસામમાં લાખો લોકો પૂરથી પ્રભાવિત થયા છે, જ્યારે પહાડી વિસ્તારોમાં વારંવાર ભૂસ્ખલન થઈ રહ્યું છે. હવામાન વિભાગે આગામી થોડા દિવસો માટે અનેક રાજ્યોમાં ભારેથી અતિ ભારે વરસાદની ચેતવણી જારી કરી છે. આ સમયગાળા દરમિયાન ભારે પવન અને વીજળી પડવાની પણ શક્યતા છે.
દિલ્હી-એનસીઆર માટે યલો એલર્ટ
રાષ્ટ્રીય રાજધાની દિલ્હી અને તેની આસપાસના વિસ્તારોમાં 30 જુલાઈથી 3 ઓગસ્ટ દરમિયાન વરસાદ અને વાવાઝોડા માટે યલો એલર્ટ જારી કરવામાં આવ્યું છે. હવામાન વિભાગે 30 જુલાઈએ વીજળીના કડાકા અને ભારે પવન સાથે ભારે વરસાદની ચેતવણી આપી છે, જ્યારે ૩ ઓગસ્ટ સુધી હળવો થી મધ્યમ વરસાદ ચાલુ રહેવાની ધારણા છે.
30 જુલાઈથી ઉત્તર પ્રદેશમાં ચોમાસું સંપૂર્ણપણે સક્રિય થઈ ગયું છે. મુઝફ્ફરનગર, સહારનપુર, ગાઝિયાબાદ, ગૌતમ બુદ્ધ નગર, અલીગઢ, આગ્રા, બરેલી અને અન્ય સહિત પશ્ચિમ ઉત્તર પ્રદેશમાં ૩૦-૩૧ જુલાઈના રોજ ભારે વરસાદ પડવાની ધારણા છે. દરમિયાન, લખનૌ, ગોરખપુર, વારાણસી અને પ્રયાગરાજ સહિત પૂર્વીય ઉત્તર પ્રદેશમાં પણ 2 થી 4 ઓગસ્ટ દરમિયાન ભારે વરસાદ પડવાની ધારણા છે.
