નાણાકીય વર્ષ ૨૦૨૫માં એર ઇન્ડિયા-એર ઇન્ડિયા એક્સપ્રેસને કુલ ₹૯,૫૬૮.૪૦ કરોડનું નુકસાન

ટાટા ગ્રુપની આગેવાની હેઠળની એરલાઇન્સ એર ઇન્ડિયા અને એર ઇન્ડિયા એક્સપ્રેસને ૩૧ માર્ચના રોજ પૂરા થયેલા નાણાકીય વર્ષ ૨૦૨૫ દરમિયાન સંયુક્ત રીતે ₹૯,૫૬૮.૪ કરોડનું કરવેરા પહેલાનું નુકસાન થયું છે. પીટીઆઈના સમાચાર અનુસાર, નાગરિક ઉડ્ડયન રાજ્યમંત્રી મુરલીધર મોહોલે ગુરુવારે લોકસભામાં રજૂ કરાયેલા કામચલાઉ ડેટામાં આ માહિતી આપી હતી. ડેટા અનુસાર, એરલાઇન્સનું કરવેરા પહેલાનું પ્રદર્શન મિશ્ર હતું. એર ઇન્ડિયાને ₹૩,૮૯૦.૨ કરોડનું નુકસાન થયું હતું, જ્યારે એર ઇન્ડિયા એક્સપ્રેસને ₹૫,૬૭૮.૨ કરોડનું નુકસાન થયું હતું. સમાચાર અનુસાર, મંત્રીએ વધુમાં આંકડા આપ્યા કે અકાસા એરને ₹1,983.4 કરોડનું નુકસાન થયું છે, સ્પાઇસજેટને ₹58.1 કરોડનું નુકસાન થયું છે, જ્યારે ઇન્ડિગોને ₹7,587.5 કરોડનો નફો થયો છે. જાન્યુઆરી 2022 માં ટાટા ગ્રુપ દ્વારા હસ્તગત કરાયેલ એર ઇન્ડિયા અને એર ઇન્ડિયા એક્સપ્રેસની આ નાણાકીય સ્થિતિ ઉડ્ડયન ક્ષેત્ર માટે એક પડકારજનક સંકેત માનવામાં આવે છે, ખાસ કરીને જ્યારે ઇન્ડિગો જેવી કંપનીઓ મોટો નફો નોંધાવી રહી છે. જાહેર કરાયેલા ડેટા દર્શાવે છે કે ઇન્ડિગો પર ₹67,088.4 કરોડનું દેવું છે. એર ઇન્ડિયા પર ₹26,879.6 કરોડ, એર ઇન્ડિયા એક્સપ્રેસ પર ₹617.5 કરોડ, સ્પાઇસજેટ પર ₹886 કરોડ અને અકાસા એર પર ₹78.5 કરોડનું દેવું છે. મંત્રી મોહલે એ પણ સ્પષ્ટતા કરી હતી કે 1994માં એર કોર્પોરેશન એક્ટ રદ થયા પછી ભારતીય ઉડ્ડયન ક્ષેત્ર સંપૂર્ણપણે નિયંત્રણમુક્ત થઈ ગયું છે. હવે એરલાઇન્સ તેમના નાણાકીય અને કાર્યકારી નિર્ણયો વ્યાપારી ધોરણે સ્વતંત્ર રીતે લે છે, જેમાં સંસાધનોનું સંચાલન અને દેવાનું પુનર્ગઠનનો સમાવેશ થાય છે. આ અહેવાલ દર્શાવે છે કે જ્યારે કેટલીક એરલાઇન્સ હજુ પણ નાણાકીય દબાણનો સામનો કરી રહી છે, ત્યારે ઇન્ડિગો જેવી કંપનીઓ આ વાતાવરણમાં નફાકારક ઉડાન ભરી રહી છે.