પાણીની શોધમાં રહેણાંક વિસ્તારમાં ઘુસ્યો દીપડો, કૂવામાં પડ્યો, ઓપરેશન બાદ બચાવી લેવાયો

નવસારી જિલ્લાના ચીખલી તાલુકાના રૂમલા ગામમાં પાણીની શોધમાં એક દીપડો કૂવામાં પડી ગયો. વન વિભાગ અને સ્થાનિક ગ્રામજનોની મદદથી, દીપડાને કોઈ પણ પ્રકારની ઈજા વિના સુરક્ષિત રીતે બચાવી લેવામાં આવ્યો. વન વિભાગે દીપડાને કસ્ટડીમાં લઈ લીધો છે અને વધુ તપાસ શરૂ કરી છે.

આ ઘટના રુમલા ગામના મોપારા ફળિયામાં બની હતી. વન વિભાગની પ્રાથમિક તપાસ મુજબ, દીપડો ગઈકાલે રાત્રે જંગલમાંથી પાણીની શોધમાં રહેણાંક વિસ્તારમાં આવ્યો હતો અને અંધારામાં કૂવામાં પડી ગયો હતો. કૂવામાંથી આવતા અવાજથી નજીકના રહેવાસીઓ જાગી ગયા હતાકૂવાના માલિક ધર્મેશભાઈને સવારે આ ઘટનાની જાણ થઈ. તેમણે તાત્કાલિક વન વિભાગના અધિકારીઓનો સંપર્ક કર્યો અને તેમને ઘટનાની જાણ કરી. દીપડો કૂવામાં પડી ગયો હોવાના સમાચાર સાંભળીને નજીકના વિસ્તારના ગ્રામજનો પણ ઘટનાસ્થળે એકઠા થઈ ગયા.

ઘટનાની માહિતી મળતાં, વન વિભાગના અધિકારીઓ અને બચાવ ટીમ તાત્કાલિક તમામ જરૂરી સાધનો અને પાંજરા સાથે મોપારા ફળિયા પહોંચી ગઈ. સ્થાનિક રહેવાસીઓની મદદથી, વન વિભાગની ટીમે પાંજરાને કૂવામાં ઉતારી દીધું અને ઘણી મહેનત પછી, દીપડાને કોઈ પણ ઈજા વિના સુરક્ષિત રીતે બચાવી લીધો.