દક્ષિણ અમેરિકન ખંડના દેશ કોલંબિયામાં શનિવારે અચાનક એક બસમાં વિસ્ફોટ થયો. દક્ષિણ પશ્ચિમ કોલંબિયામાં બસમાં મુસાફરી કરી રહેલા લોકોને નિશાન બનાવીને આ વિસ્ફોટ કરવામાં આવ્યો હતો. આ હુમલામાં 13 લોકોના મોત થયા છે. અત્યાર સુધી મળેલી માહિતી મુજબ, 38 લોકો ઘાયલ થયા છે, ઘાયલોને સારવાર માટે હોસ્પિટલમાં દાખલ કરવામાં આવ્યા છે. કોલંબિયાના સેના પ્રમુખે તેને "આતંકવાદી હુમલો" ગણાવ્યો છે. તમને જણાવી દઈએ કે આ પ્રદેશમાં ડ્રગ્સની તસ્કરી સંબંધિત હિંસા સતત વધી રહી છે.
આ ઘટના અંગે, કાકા પ્રદેશના ગવર્નર, ઓક્ટાવિયો ગુઝમેને જણાવ્યું હતું કે કાજીબિયો નગરપાલિકામાં પેનામેરિકન હાઇવે પર એક બસ પસાર થઈ રહી હતી ત્યારે વિસ્ફોટ થયો હતો. કાકાના આરોગ્ય સચિવ, કેરોલિના કેમાર્ગોએ જણાવ્યું હતું કે ઘાયલોમાં પાંચ બાળકો પણ છે. કોલમ્બિયન સશસ્ત્ર દળોના કમાન્ડર, જનરલ હ્યુગો લોપેઝે એક પ્રેસ કોન્ફરન્સમાં કહ્યું હતું કે આ એક આતંકવાદી કૃત્ય છે અને તેના માટે ઇવાન મોર્ડિસ્કો નામના કુખ્યાત ગુનેગારની ગેંગ અને જેમે માર્ટિનેઝ ગેંગને જવાબદાર ઠેરવ્યા હતા.
બંને જૂથો કોલંબિયાના રિવોલ્યુશનરી આર્મ્ડ ફોર્સિસના અસંતુષ્ટ જૂથો છે, જે આ પ્રદેશમાં સક્રિય છે. આ જૂથોએ સરકાર સાથે 2016 ના શાંતિ કરારનું પાલન કર્યું ન હતું. કોલંબિયાના રાષ્ટ્રપતિ ગુસ્તાવો પેટ્રોએ આ હુમલાની નિંદા કરતા કહ્યું કે જેમણે નિર્દોષ નાગરિકોની હત્યા કરી, જેમાં ઘણા સ્વદેશી લોકોનો પણ સમાવેશ થાય છે, તેઓ આતંકવાદી, ફાશીવાદી અને ડ્રગ તસ્કર છે. તાજેતરના દિવસોમાં જાહેર માળખાને નિશાન બનાવતા શ્રેણીબદ્ધ વિસ્ફોટોમાં આ નવીનતમ ઘટના છે. છેલ્લા બે દિવસમાં દક્ષિણપશ્ચિમ કોલંબિયામાં ઓછામાં ઓછી 26 હિંસક ઘટનાઓ બની છે.
