દિલ્હીમાં દુ:ખદ અકસ્માત, ફૂટપાથ પર સૂતેલા 5 લોકો પર ઓડી ચાલકે ગાડી ચડાવી; ડ્રાઈવરની ધરપકડ

રાજધાની દિલ્હીમાં એક દુ:ખદ માર્ગ અકસ્માતમાં પાંચ લોકો ઘાયલ થયાનો કિસ્સો પ્રકાશમાં આવ્યો છે. આ અકસ્માત દક્ષિણ-પશ્ચિમ દિલ્હીના વસંત વિહાર વિસ્તારમાં બન્યો હતો. શિવ કેમ્પ નજીક ફૂટપાથ પર સૂતા પાંચ લોકોને નશામાં ધૂત ઓડી કાર ચાલકે કચડી નાખ્યા હતા, જેના કારણે તેઓ ઘાયલ થયા હતા. એક અધિકારીએ જણાવ્યું કે ઘાયલોમાં બે યુગલો અને એક આઠ વર્ષની છોકરીનો સમાવેશ થાય છે. તેમણે જણાવ્યું કે આ ઘટના 9 જુલાઈની રાત્રે લગભગ 1:45 વાગ્યે બની હતી. કાર ચાલક ઉત્સવ શેખર (40)ની ધરપકડ કરવામાં આવી હતી, જેને બાદમાં જામીન પર મુક્ત કરવામાં આવ્યો હતો. પોલીસ અધિકારીએ જણાવ્યું હતું કે આરોપી કાર ચાલકના મેડિકલ રિપોર્ટમાં પુષ્ટિ મળી છે કે ઘટના સમયે તે નશામાં હતો. અધિકારીઓ ઘટનાસ્થળે પહોંચે તે પહેલાં જ ઘાયલોને સારવાર માટે નજીકની હોસ્પિટલોમાં લઈ જવામાં આવ્યા હતા. પીડિતોની ઓળખ લાધી (40), તેની આઠ વર્ષની પુત્રી બિમલા, તેના પતિ સબમી ઉર્ફે ચિરમા (45), રામ ચંદ્ર (45) અને તેની પત્ની નારાયણી (35) તરીકે થઈ છે. બધા રાજસ્થાનના રહેવાસી છે. પોલીસે જણાવ્યું હતું કે આરોપીઓ સામે કાયદેસરની કાર્યવાહી શરૂ કરવામાં આવી છે.