પાલનપુર તાલુકાના ગઢ-ચડોતર માર્ગ પર અચાનક મોટું વૃક્ષ ધરાશાયી થતાં માર્ગ પર વાહનવ્યવહાર ખોરવાયો હતો. વૃક્ષ રસ્તા પર પડતા બંને તરફ વાહનોની લાંબી કતારો લાગી હતી અને વાહન ચાલકો મુશ્કેલીમાં મુકાયા હતા.
માર્ગ અવરોધાતા મોટા વાહનો અટવાઈ ગયા હતા, જ્યારે નાના વાહનચાલકો રસ્તાની સાઈડમાંથી વાહનો પસાર કરવા મજબૂર બન્યા હતા. ઘટનાની જાણ થતાં તંત્ર દ્વારા તાત્કાલિક કાર્યવાહી હાથ ધરવામાં આવી હતી. અને વૃક્ષને કાપીને માર્ગ ખુલ્લો કરવાની કામગીરી શરૂ કરવામાં આવી હતી.
દરમિયાન ગઢ-ચડોતર માર્ગ પર અન્ય સ્થળોએ પણ કેટલાક જોખમી અને સૂકાઈ ગયેલા વૃક્ષો તથા ડાળીઓ જોવા મળતી હોવાના કારણે ગમે ત્યારે અકસ્માત સર્જાવાની ભીતિ વ્યક્ત થઈ રહી છે. મોટી દુર્ઘટના ટાળવા માટે માર્ગ અને મકાન વિભાગ દ્વારા વહેલી તકે આવા જોખમી વૃક્ષો અને ડાળીઓ દૂર કરવામાં આવે તેવી વાહન ચાલકો દ્વારા ઉગ્ર માંગ કરવામાં આવી છે.
