ટોલ પ્લાઝા પર આજથી નવા નિયમો : FASTag નહીં હોય તો UPIથી 1.25 ગણો ટેક્સ, રોકડ વ્યવહાર બંધ

જો તમે નેશનલ હાઈવે પર મુસાફરી કરી રહ્યા હોવ, તો આ સમાચાર તમારા માટે ખૂબ જ મહત્વના છે. NHAI એટલે કે નેશનલ હાઈવે ઓથોરિટી ઓફ ઈન્ડિયાએ દેશના તમામ ટોલ પ્લાઝાને સંપૂર્ણપણે ડિજિટલ બનાવી દીધા છે. ગત 1 એપ્રિલથી રોકડ વ્યવહારો બંધ કર્યા બાદ, હવે 10 એપ્રિલથી ફાસ્ટેગના નવા અને કડક નિયમો લાગુ કરી દેવામાં આવ્યા છે. નવા નિયમ મુજબ, જો તમારી ગાડીમાં FASTag નથી અથવા તેમાં રિચાર્જ નથી, તો તમે માત્ર UPI દ્વારા જ ચૂકવણી કરી શકશો. પરંતુ ધ્યાન રાખજો, UPI થી પેમેન્ટ કરવા પર તમારે સામાન્ય ટોલ કરતા 1.25 ગણો વધારે ચાર્જ આપવો પડશે. એટલું જ નહીં, જો તમારો ટેગ બ્લેકલિસ્ટ હશે અથવા મિનિમમ બેલેન્સ નહીં હોય, તો તમારે બમણો ટોલ ચૂકવવો પડશે. NHAI એ હવે ઈ-નોટિસની સુવિધા પણ શરૂ કરી છે. જો કોઈ કારણસર ટોલ ડિજિટલ રીતે નથી ચૂકવાયો, તો તમને નોટિસ મળશે. જો આ રકમ 3 દિવસમાં જમા નહીં કરાવો, તો તમારી ચૂકવવાપાત્ર રકમ બમણી થઈ જશે. ડિજિટલ નેટવર્કને 100 ટકા સફળ બનાવવા માટે સરકારે આ આકરો નિર્ણય લીધો છે.