નીરજ ચોપરાએ વર્લ્ડ એથ્લેટિક્સ ચેમ્પિયનશિપની ફાઇનલમાં પ્રવેશ કર્યો

ભારતના સ્ટાર એથ્લીટ નીરજ ચોપરાએ જાપાનમાં રમાઈ રહેલી વર્લ્ડ એથ્લેટિક્સ ચેમ્પિયનશિપમાં શાનદાર પ્રદર્શન કર્યું છે. નીરજ વર્લ્ડ એથ્લેટિક્સ ચેમ્પિયનશિપ 2025ના ક્વોલિફિકેશન રાઉન્ડમાં શાનદાર થ્રો ફેંકીને ફાઇનલમાં સ્થાન મેળવ્યું છે. નીરજ પહેલા જ થ્રોમાં 84.85 મીટર ભાલા ફેંકીને ફાઇનલમાં ટિકિટ મેળવી લીધી છે. હવે નીરજ ફાઇનલમાં પોતાના ટાઇટલનો બચાવ કરશે. તમને જણાવી દઈએ કે, નીરજ વર્લ્ડ એથ્લેટિક્સ ચેમ્પિયનશિપમાં ડિફેન્ડિંગ ચેમ્પિયન છે. તેણે 2023માં બુડાપેસ્ટમાં યોજાયેલી છેલ્લી વર્લ્ડ એથ્લેટિક્સ ચેમ્પિયનશિપમાં ગોલ્ડ મેડલ જીત્યો હતો. નીરજે સતત પાંચમી વૈશ્વિક ચેમ્પિયનશિપ માટે આ સિદ્ધિ હાંસલ કરી, ફાઇનલમાં ક્વોલિફાય થવા માટે તેને ફક્ત એક પ્રયાસની જરૂર હતી. તેણે અગાઉ 2021 ઓલિમ્પિક, 2022 વર્લ્ડ ચેમ્પિયનશિપ, 2023 વર્લ્ડ ચેમ્પિયનશિપ અને 2024 ઓલિમ્પિકમાં આ સિદ્ધિ હાંસલ કરી છે. નીરજ ચોપરા હવે ફાઇનલમાં સતત બીજી વખત ઇતિહાસ રચવા માંગશે. નીરજ ઉપરાંત, જર્મનીના જુલિયન વેબરે 87.21 મીટરના થ્રો સાથે ફાઇનલ માટે ક્વોલિફાય કર્યું. તેણે પોતાના બીજા પ્રયાસમાં પોતાનું સ્થાન સુરક્ષિત કર્યું. વર્લ્ડ એથ્લેટિક્સ ચેમ્પિયનશિપના ફાઇનલમાં નીરજને પાકિસ્તાનના અરશદ નદીમ તરફથી કઠિન પડકારનો સામનો કરવો પડશે. ચોપરા 2024 પેરિસ ઓલિમ્પિક પછી પહેલી વાર નદીમનો સામનો કરશે. આનાથી તેને પેરિસ ઓલિમ્પિકમાં બીજા સ્થાનનો બદલો લેવાની એક સારી તક મળશે. નદીમે પેરિસ ઓલિમ્પિકમાં 92.97 મીટરના રેકોર્ડબ્રેક થ્રો સાથે ગોલ્ડ મેડલ જીત્યો હતો. બીજી તરફ, ચોપરાને 89.45 મીટરના થ્રો સાથે સિલ્વર મેડલથી સંતોષ માનવો પડ્યો.