ઉત્તરાખંડના જોશીમઠ વિસ્તારમાં શનિવારે એક મોટી દુર્ઘટના બની હતી. છ મુસાફરોને લઈને ટ્રાન્સા કંપનીનું હેલિકોપ્ટર બદ્રીનાથ ધામથી ઋષિકેશ જઈ રહ્યું હતું. ખરાબ હવામાનને કારણે હેલિકોપ્ટર છાય અને થાયંગ ગામોની ઉપર ક્રેશ થયું હતું. તેમાં સવાર તમામ છ લોકોના મોત થયાના અહેવાલ છે. ચમોલી જિલ્લા મેજિસ્ટ્રેટ ગૌરવ કુમારે જણાવ્યું હતું કે સેનાએ ઘટના અંગે વહીવટીતંત્રને જાણ કરી હતી. ત્યારબાદ વહીવટીતંત્રે સ્થળ શોધી કાઢ્યું અને હેલિકોપ્ટર ક્રેશની પુષ્ટિ કરી.
મુખ્યમંત્રી પુષ્કર સિંહ ધામીએ હેલિકોપ્ટર દુર્ઘટના પર શોક વ્યક્ત કર્યો. મુખ્યમંત્રી ધામીએ તેમના ઇન્સ્ટાગ્રામ હેન્ડલ પર જણાવ્યું કે તેમને જોશીમઠના ચાઈ ગામ નજીક હેલિકોપ્ટર દુર્ઘટનાના દુર્ભાગ્યપૂર્ણ સમાચાર મળ્યા છે. જિલ્લા વહીવટીતંત્ર, આપત્તિ વ્યવસ્થાપન વિભાગ અને SDRF સંયુક્ત રીતે બચાવ કામગીરી ચલાવી રહ્યા છે. તેઓ સમગ્ર ઘટના પર સતત નજર રાખી રહ્યા છે. તેમણે ગંભીર રીતે ઘાયલોને વધુ સારી સારવાર માટે તાત્કાલિક ઉચ્ચ કેન્દ્રમાં ખસેડવાના નિર્દેશો આપ્યા છે.
