અંજાર તાલુકાના ખંભરા ગામે આવેલ પ્રાચીન મતિયાદેવ મંદિરમાં રાત્રિના સમયે દાનપેટીની ચોરી કરનાર ચડ્ડી-બનિયાન ગેંગના ચાર આરોપીઓને અંજાર પોલીસે મુદ્દામાલ સાથે ઝડપી પાડ્યા છે. આ સફળ કામગીરી પીઆઈ એચ. એ. જાડેજાની ટીમે કરી છે, જેમાં પોલીસે ₹૨૪,૯૬૦ નો મુદ્દામાલ જપ્ત કર્યો છે. પકડાયેલા ચારેય આરોપીઓ દાહોદ અને રાજકોટના છે, જ્યારે અન્ય ત્રણ નાસતા ફરતા આરોપીઓને શોધવા માટે ચક્રો ગતિમાન કરવામાં આવ્યા છે.
પૂર્વ કચ્છ એસપી સાગર બાગમાર અને ડીવાયએસપી એમ.પી. ચૌધરીની સૂચનાથી પીઆઈ એચ.એ. જાડેજા અને તેમની ટીમે તપાસ હાથ ધરી હતી. ટેકનિકલ અને હ્યુમન સોર્સના આધારે પોલીસે વર્ષામેડી-મેઘપર કેનાલ નજીકથી દરોડો પાડી મિથુન વરસીંગ મોહનીયા, અંશુ બચુ કટારા, દિનેશ શબુરભાઈ ડામોર અને સમુ નબળાભાઈ મોહનીયાની અટકાયત કરી હતી.
પૂછપરછ દરમિયાન મિથુને કબૂલાત કરી હતી કે અગાઉ વીજ લાઈનની મજૂરી કરતી વખતે તેણે આ મંદિરમાં ચોરીનું આયોજન કર્યું હતું. ત્યારબાદ તેઓ રાજકોટથી બોલેરો પીકઅપ ગાડીમાં ૭ સાગરીતો સાથે આવ્યા હતા અને ખંભરાના મતિયાદેવ મંદિરની દાનપેટી તેમજ સિનુગ્રાની વાડીમાંથી મોબાઈલની ચોરી કરી હતી. પોલીસે આરોપીઓ પાસેથી ₹૪,૯૬૦ રોકડા અને ૪ મોબાઈલ ફોન (કુલ કિંમત રૂ. ૨૪,૯૬૦) જપ્ત કર્યા છે. આ ગુનામાં સામેલ અન્ય ૩ ફરાર આરોપીઓ જબલો ડામોર, સુમલો કટારા અને સાગર મોહનીયાને પકડવા માટે તજવીજ હાથ ધરવામાં આવી છે.
