મહેસાણાના કડી તાલુકામાં આવેલા રાજપુર ગામમાં ભૂગર્ભ જળ પ્રદૂષિત થવાની અત્યંત ગંભીર ઘટના સામે આવી છે. ગામના ખેડૂતોના આશરે ૨૭ થી ૨૮ જેટલા બોરવેલમાંથી અચાનક લાલ રંગનું પ્રદૂષિત પાણી બહાર આવવા લાગતા લોકોમાં ચિંતાનું મોજું ફરી વળ્યું છે. સ્થાનિકોનો આરોપ છે કે નજીકમાં આવેલી કેમિકલ કંપનીઓ રાતના સમયે પોતાનો ઝેરી કચરો અને કેમિકલ જમીનમાં ઉતારી રહી છે, જેના પરિણામે જમીનનું તળ સંપૂર્ણપણે બગડી ગયું છે. આ ઝેરી પાણીના કારણે ગામની ફળદ્રુપ જમીનો બંજર બની રહી છે અને ખેડૂતોને મોટું આર્થિક નુકસાન વેઠવાનો વારો આવ્યો છે.
આ પ્રદૂષિત પાણીની માઠી અસર માત્ર ખેતીવાડી પૂરતી સીમિત નથી રહી, પરંતુ ગ્રામજનોના આરોગ્ય માટે પણ તે જોખમી સાબિત થઈ રહી છે. દૂષિત પાણીના સંપર્કમાં આવવાથી લોકોમાં ચામડીના વિવિધ રોગો, શ્વાસની તકલીફો અને ખંજવાળની સમસ્યાઓ સતત વધી રહી છે. વધુમાં, આ કેમિકલયુક્ત પાણીથી ભવિષ્યમાં કેન્સર જેવી જીવલેણ બીમારીઓ ફેલાવવાની દહેશત પણ લોકોને સતાવી રહી છે. ભૂગર્ભમાં શુદ્ધ પીવાના પાણીનું અસ્તિત્વ જ ન રહેતા, હવે ગામલોકોએ ફરજિયાતપણે બહારથી ટેન્કર કે આર.ઓ. (RO) નું પાણી વેચાતું લઈને પીવા માટે મજબૂર બનવું પડ્યું છે.
આ ગંભીર મુદ્દે લોકોના વિરોધ બાદ ગુજરાત પ્રદૂષણ નિયંત્રણ બોર્ડ (GPCB) ની ટીમ હરકતમાં આવી છે અને ત્રણ બોરવેલમાંથી પાણીના નમૂના લઈ વધુ તપાસ અર્થે મુખ્ય કચેરીએ મોકલી આપ્યા છે. આ સમસ્યાના કાયમી નિવારણ માટે એક સેન્ટ્રલ કમિટીની પણ રચના કરવામાં આવી છે. બીજી તરફ, કડીના પૂર્વ ધારાસભ્ય ભરતજી ઠાકોરે કલેક્ટરને લેખિતમાં ફરિયાદ કરી છે, જેમાં તેમણે અંબુજા સોલ્વેક્સઅને અંબુજા ઈન્ટરમીડિએટ્સ'ફેક્ટરીઓ પર જમીનમાં ઝેરી પાણી છોડવાનો સીધો આરોપ લગાવ્યો છે. તેમણે એવી પણ આકરી ચીમકી આપી છે કે જો તંત્ર દ્વારા આ જવાબદાર કંપનીઓ સામે તાત્કાલિક કડક કાયદાકીય પગલાં લઈને તેમને બંધ કરવામાં નહીં આવે, તો આવનારા દિવસોમાં ગ્રામજનો સાથે મળીને રસ્તા પર ઉતરી ઉગ્ર જન-આંદોલન છેડવામાં આવશે.
