બ્રિટન સરકારે ધૂમ્રપાન સામે દુનિયાનો સૌથી કડક કાયદો પસાર કરી દીધો છે. 'ટોબેકો એન્ડ વેપ્સ બિલ' હવે બ્રિટનની સંસદના બંને ગૃહોમાં પસાર થઈ ચૂક્યું છે. આ કાયદા હેઠળ વર્ષ 2008 પછી જન્મેલા લોકો હવે ક્યારેય પણ કાયદેસર રીતે તમાકુ કે સિગારેટ ખરીદી શકશે નહીં. આ કાયદો 1 જાન્યુઆરી 2027થી લાગુ થશે. આશ્ચર્યની વાત એ છે કે, તમાકુ ખરીદવાની ઉંમર મર્યાદા દર વર્ષે 1 વર્ષ વધતી જશે, એટલે કે જે લોકો આજે 18 વર્ષથી ઓછી ઉંમરના છે, તેઓ જીવનમાં ક્યારેય પણ સિગારેટ ખરીદવા માટે કાયદેસર રીતે લાયક ઠરશે નહીં. આ ઉપરાંત વેપિંગ એટલે કે ઈ-સિગારેટ પર પણ કડક પ્રતિબંધો લાદવામાં આવ્યા છે.
બ્રિટન સરકારનું લક્ષ્ય છે - 'સ્મોક ફ્રી પેઢી'. દર વર્ષે તમાકુથી થતા 76,000 મૃત્યુને રોકવા માટેનો આ મોટો પ્રયાસ
બ્રિટનમાં દર વર્ષે 76 હજારથી વધુ લોકો ધૂમ્રપાનને કારણે જીવ ગુમાવે છે. આ મોતોને રોકવા અને આરોગ્ય સેવા (NHS) પરનું ભારણ ઘટાડવા કિંગ ચાર્લ્સ III ની મંજૂરી બાદ આ કાયદો અમલી બનશે. જોકે, ન્યૂઝીલેન્ડ આવો કાયદો લાવીને પાછો ખેંચી ચૂક્યું છે, ત્યારે હવે આખું વિશ્વ બ્રિટનના આ પ્રયોગ પર નજર રાખી રહ્યું છે.
