આશા ભોંસલેના નિધનથી દેશભરમાં શોકની લહેર ફેલાઈ ગઈ છે. રાજકીય નેતાઓએ પણ શોક વ્યક્ત કર્યો છે. વડા પ્રધાન નરેન્દ્ર મોદી, મહારાષ્ટ્રના મુખ્યમંત્રી દેવેન્દ્ર ફડણવીસ અને કેન્દ્રીય મંત્રી નીતિન ગડકરી સહિત અન્ય લોકોએ તેમના પરિવાર પ્રત્યે ઊંડી સંવેદના વ્યક્ત કરી છે. પ્રધાનમંત્રી નરેન્દ્ર મોદીએ આશા ભોંસલેના નિધન પર ઊંડો શોક વ્યક્ત કર્યો છે. તેમણે સોશિયલ મીડિયા પર આશા ભોંસલે સાથેના પોતાના કેટલાક જૂના ફોટોગ્રાફ્સ શેર કર્યા અને લખ્યું, "ભારતના સૌથી પ્રખ્યાત અને બહુમુખી અવાજોમાંના એક, આશા ભોંસલેજીના નિધનથી મને ખૂબ જ દુઃખ થયું છે. દાયકાઓ સુધી ચાલેલી તેમની અસાધારણ સંગીત યાત્રાએ આપણા સાંસ્કૃતિક વારસાને સમૃદ્ધ બનાવ્યો અને વિશ્વભરના અસંખ્ય હૃદયને સ્પર્શી લીધા. ભલે તે તેમના હૃદયસ્પર્શી સૂરો હોય કે તેમની જુસ્સાદાર રચનાઓ, તેમના અવાજમાં હંમેશા એક અનોખી ચમક રહી. હું તેમની સાથેની મારી વાતચીતની યાદોને હંમેશા યાદ રાખીશ. તેમના પરિવાર, ચાહકો અને સંગીત પ્રેમીઓ પ્રત્યે મારી ઊંડી સંવેદના. તેઓ આવનારી પેઢીઓને પ્રેરણા આપતા રહેશે, અને તેમના ગીતો હંમેશા લોકોના જીવનમાં ગુંજતા રહેશે."
મહારાષ્ટ્રના મુખ્યમંત્રી દેવેન્દ્ર ફડણવીસે કહ્યું, કે "આ સમગ્ર ભારત અને વિશ્વના સંગીત પ્રેમીઓ માટે ખૂબ જ દુઃખદ સમય છે. ભારતના ઇતિહાસમાં સંગીત માટે તેમણે જે સેવા કરી છે, મંગેશકર પરિવારે સંગીત માટે જે સેવા કરી છે, લતા દીદીના રૂપમાં પ્રથમ સ્ટાર, આપણે પહેલો સ્ટાર ઝાંખો પડતો જોયો, સંગીતનો બીજો સ્ટાર પણ આજે અદૃશ્ય થઈ ગયો છે, આ વાતનું આપણે બધા ખૂબ જ દુઃખી છીએ. બાળપણથી લઈને 92 વર્ષની ઉંમર સુધી તેમણે સતત સંગીતની સેવા કરી. તેઓ વિશ્વના એકમાત્ર ગાયિકા છે જેમણે તેમના 90મા જન્મદિવસ પર 3 કલાકનો કોન્સર્ટ કર્યો. તેમણે તેમના છેલ્લા શ્વાસ સુધી સંગીતની સેવા કરી. આપણે બધા જાણીએ છીએ કે શાસ્ત્રીય સંગીતથી લઈને પોપ, રોક સુધી, તેમણે આપણને તમામ પ્રકારનું સંગીત આપ્યું, તમામ પ્રકારના ગીતો ગાયા, ખાસ કરીને આરડી બર્મનજી અને તેઓ સંગીતને એક અલગ ક્ષેત્રમાં લઈ ગયા અને ભારતમાં એવી કોઈ ભાષા નથી જેમાં તેમણે ગાયું ન હોય. તેમણે 20 થી વધુ ભાષાઓમાં 12000 થી વધુ ગીતો ગાયા છે. એક એવા ગાયકનું અવસાન જેનામાં ભગવાન રહેતો હતો તે ભારત માટે અને બધા માટે એક મોટું નુકસાન છે." આપણે બધા તેના પરિવારના દુઃખમાં સહભાગી છીએ.
