દેશમાં 100 નવા એરપોર્ટ બનાવવામાં આવશે, અમદાવાદ હબ એન્ડ સ્પોક સેવા ધરાવતું દેશનું ત્રીજું એરપોર્ટ બનશે

કેન્દ્રીય નાગરિક ઉડ્ડયન મંત્રી રામ મોહન નાયડુએ મંગળવારે જણાવ્યું હતું કે પ્રાદેશિક હવાઈ જોડાણ યોજના 'ઉડે દેશ કા આમ નાગરિક' (UDAN) હેઠળ આગામી 10 વર્ષમાં દેશમાં 30,000 કરોડ રૂપિયાના ખર્ચે 100 નવા એરપોર્ટ બનાવવામાં આવશે. રામ મોહન નાયડુએ ગુજરાતમાં અમદાવાદ એરપોર્ટથી ભારતની ત્રીજી 'હબ એન્ડ સ્પોક' સેવાનું ઉદ્ઘાટન કર્યું. આ કાર્યક્રમમાં ગુજરાતના મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી પણ હાજર રહ્યા હતા. 

અમદાવાદ એરપોર્ટ "હબ એન્ડ સ્પોક" સેવા પ્રદાન કરનાર ભારતનું ત્રીજું એરપોર્ટ બન્યું છે, જેનો ઉદ્દેશ્ય ભારતીય એરપોર્ટનો ઉપયોગ હબ તરીકે કરીને દેશના વિવિધ ભાગોના મુસાફરોને આંતરરાષ્ટ્રીય સ્થળો સાથે સરળતાથી જોડવાનો છે. વારાણસી એરપોર્ટ આ સેવા શરૂ કરનાર દેશનું પ્રથમ એરપોર્ટ હતું. ત્યારબાદ, અમૃતસર એરપોર્ટે પણ આ વર્ષે જુલાઈમાં આ સેવા શરૂ કરી હતી.

હબ-એન્ડ-સ્પોક સેવા એ ઉડ્ડયન ક્ષેત્રમાં ઉપયોગમાં લેવાતું એક લોકપ્રિય ઓપરેશનલ મોડેલ છે. આ સેવા હેઠળ, એક મોટું એરપોર્ટ હબ તરીકે કાર્ય કરે છે, જ્યારે નાના એરપોર્ટ સ્પોક તરીકે કાર્ય કરે છે. ઉદાહરણ તરીકે, અયોધ્યાથી લંડન જતો મુસાફર સ્પોક એરપોર્ટથી હબ એરપોર્ટ, અમદાવાદ જશે અને પછી અમદાવાદથી લંડન માટે કનેક્ટિંગ ફ્લાઇટ લેશે.

નાગરિક ઉડ્ડયન મંત્રીએ કહ્યું, ક  2014માં ભારતમાં ૭૪ એરપોર્ટ હતા, જ્યારે આજે દેશના હવાઈ નકશા પર 166 એરપોર્ટ છે. 74 થી 166 એરપોર્ટનો વધારો દેશ માટે એક રેકોર્ડ છે. છેલ્લા 12 વર્ષમાં, લગભગ દર 40 દિવસે એક નવું એરપોર્ટ અથવા નવું ટર્મિનલ પૂર્ણ થયું છે.