ટીમ ઈન્ડિયાએ પાકિસ્તાન સામે પોતાનો અજેય રેકોર્ડ જાળવી રાખ્યો, સતત 12મી ODI જીત નોંધાવી

ODI ફોર્મેટમાં પાકિસ્તાન સામેની અજેય ઝુંબેશ ચાલુ રાખતા, ભારતીય મહિલા ટીમે મહિલા ODI વર્લ્ડ કપ 2025 માં રમાયેલી મેચ 88 રનથી જીતી લીધી. કોલંબોના આર પ્રેમદાસા સ્ટેડિયમ ખાતે રમાયેલી આ મેચમાં, ટીમ ઈન્ડિયા ટોસ હારીને પહેલા બેટિંગ કરવા આવી હતી, ત્યારબાદ આખી ઈનિંગ 50 ઓવરમાં 247 રનમાં સમેટાઈ ગઈ હતી. ટીમ ઈન્ડિયા તરફથી હરલીન દેઓલે સૌથી વધુ 46 રનની ઈનિંગ રમી હતી. 248 રનના લક્ષ્યનો પીછો કરતા, પાકિસ્તાની મહિલા ટીમનો ઈનિંગ 43 ઓવરમાં 159 રનમાં સમેટાઈ ગયો હતો. બોલિંગમાં ટીમ ઈન્ડિયા તરફથી ક્રાંતિ ગૌર અને દીપ્તિ શર્માએ સૌથી વધુ 3-3 વિકેટ લીધી હતી. ભારત સામે 248 રનના લક્ષ્યાંકનો પીછો કરવા ઉતરેલી પાકિસ્તાનની શરૂઆત ખરાબ રહી, તેણે 26 રનમાં ત્રણ વિકેટ ગુમાવી દીધી. ત્યારબાદ સિદ્રા અમીને ઇનિંગને સ્થિર કરવાનો પ્રયાસ કર્યો, પરંતુ બીજા છેડે નિયમિત અંતરાલે વિકેટો પડી. સિદ્રા અમીને 106 બોલનો સામનો કર્યો અને 81 રન બનાવ્યા. પાકિસ્તાની ઇનિંગમાં આઠ ખેલાડીઓ બે આંકડા સુધી પહોંચી શક્યા નહીં. ટીમ ઇન્ડિયા માટે ક્રાંતિ ગૌર અને દીપ્તિ શર્મા શ્રેષ્ઠ બોલર રહ્યા, ક્રાંતિએ તેની 10 ઓવરમાં માત્ર 20 રન આપીને ત્રણ વિકેટ લીધી. દિપ્તિ શર્માએ તેની નવ ઓવરમાં 45 રન આપીને ત્રણ વિકેટ લીધી, જ્યારે સ્નેહ રાણાએ પણ બે વિકેટ લીધી. જો આ મેચમાં ભારતીય મહિલા ટીમના બેટિંગ પ્રદર્શનની વાત કરીએ તો ચોક્કસ થોડી નિરાશા જોવા મળી. ટીમ ઈન્ડિયા તરફથી હરલીન દેઓલે સૌથી વધુ 46 રન બનાવ્યા, જ્યારે ડેથ ઓવર્સમાં બેટિંગ કરતી રિચા ઘોષે 20 બોલમાં 35 રનની અણનમ ઇનિંગ રમી અને ટીમનો સ્કોર 247 રન સુધી પહોંચાડવામાં મુખ્ય ભૂમિકા ભજવી. ટીમ ઈન્ડિયા હવે 9 ઓક્ટોબરે મહિલા વનડે વર્લ્ડ કપમાં દક્ષિણ આફ્રિકાની મહિલા ટીમ સામે પોતાનો આગામી મુકાબલો રમવાની છે.