અંડર-19 એશિયા કપની ફાઇનલમાં ભારતનો સામનો પાકિસ્તાન સામે થયો હતો . આ મેચમાં ટીમ ઇન્ડિયાએ છેલ્લા બોલ પર 1 વિકેટથી રોમાંચક વિજય મેળવ્યો હતો. પાકિસ્તાને ટોસ જીતીને પહેલા બેટિંગ કરવાનો નિર્ણય લીધો હતો. પહેલા બેટિંગ કરતા પાકિસ્તાને 50 ઓવરમાં 9 વિકેટ ગુમાવીને 337 રન બનાવ્યા હતા. આ મેચમાં પાકિસ્તાન માટે ઉસ્માન ખાને 107 રનની ઇનિંગ રમી હતી. ટીમ ઇન્ડિયાએ છેલ્લા બોલ પર એક વિકેટ બાકી રહેતા આ લક્ષ્ય હાંસલ કર્યું હતું. ભારતે 50 ઓવરમાં 9 વિકેટ ગુમાવીને 339 રન બનાવ્યા હતા. ટીમ ઇન્ડિયા માટે મનલ ચૌહાણ અને મોહિત ઉલવા આ મેચના હીરો રહ્યા હતા. મોહિતે છેલ્લા બોલ પર ચોગ્ગો મારીને ટીમને જીત અપાવી હતી.
ટોસ જીતીને પહેલા બેટિંગ કરવાનો નિર્ણય લેનાર પાકિસ્તાનની શરૂઆત સારી રહી. ઉસ્માન ખાન અને હયમ ખાને પ્રથમ વિકેટ માટે 67 રનની ઓપનિંગ ભાગીદારી કરી. ઓપનર ઉસ્માન ખાને શાનદાર 107 (શતક) ફટકારી, જ્યારે અબ્દુલ કાદિર (80) અને કેપ્ટન ફરહાન યુસુફ (63) એ પણ શાનદાર અડધી સદી ફટકારી. એક સમયે એવું લાગતું હતું કે પાકિસ્તાન સરળતાથી 400 સુધી પહોંચી જશે, પરંતુ ભારતીય બોલરોએ અંતિમ ઓવરોમાં જોરદાર વાપસી કરી, એક પછી એક વિકેટો ઝડપીને પાકિસ્તાનને મોટો સ્કોર કરતા અટકાવ્યું. હયમ ખાને 21, અહેમદ હુસૈન 17, નિકાબ શફીકે 11, હમઝા ઝહૂરે 10 અને મોહમ્મદ સૈયમે 7 રન બનાવ્યા. ભારત માટે કાવ્યા પટેલ સૌથી સફળ બોલર રહી, તેણે 4 વિકેટ લીધી, જ્યારે વેંકટે 3 અને અર્જુન રાજપૂતે 1 વિકેટ લીધી હતી.
ટીમ ઈન્ડિયાએ રન ચેઝમાં સારી શરૂઆત કરી હતી. આર્યવીર સેહવાગ અને લક્ષ્ય રાયચંદાનીએ પ્રથમ વિકેટ માટે 95 રનની ભાગીદારી કરી હતી. જોકે, બંનેએ ખૂબ જ ધીમી બેટિંગ કરી હતી. આર્યવીર સેહવાગ 58 રન બનાવીને આઉટ થયો હતો. કેપ્ટન લક્ષ્ય રાયચંદાનીએ ટીમ માટે સૌથી વધુ રન બનાવ્યા, તેમણે 100 બોલમાં 80 રન બનાવ્યા. આ બે સિવાય, અન્ય ભારતીય બેટ્સમેન ખાસ કંઈ કરી શક્યા નહીં. મનલ ચૌહાણે અંતિમ ઓવરોમાં ઝડપી ગતિએ રન બનાવ્યા. તેણે મોહિત ઉલ્વા સાથે મળીને અડધી સદીની ભાગીદારી કરી અને ટીમ ઈન્ડિયાને મેચમાં પાછી લાવી હતી.
