ભારતમાલા હાઈવે પર SOGની તવાઈ: વાવ-થરાદ પોલીસે ₹9.69 લાખનો વિદેશી દારૂ ઝડપ્યો

વાવ: બનાસકાંઠા જિલ્લાની વાવ-થરાદ SOG (સ્પેશિયલ ઓપરેશન ગ્રુપ) શાખાએ ભારતમાલા નેશનલ હાઈવે પર દારૂની હેરાફેરીનું મોટું નેટવર્ક ઝડપી પાડ્યું છે. વાવ પોલીસ સ્ટેશન વિસ્તારના દેથળી ગામની સીમમાંથી પસાર થતા હાઈવે પરથી પોલીસે ભારતીય બનાવટના વિદેશી દારૂની કુલ 1758 બોટલો સાથે એક કેમ્પર ગાડી જપ્ત કરી છે. ઘટનાની વિગત મુજબ, SOG શાખાનો સ્ટાફ નાઈટ પેટ્રોલીંગમાં હતો ત્યારે સાંચોર (રાજસ્થાન) તરફથી આવતી એક સફેદ રંગની શંકાસ્પદ મહિન્દ્રા બોલેરો કેમ્પર ગાડી દેખાઈ હતી. ગાડી પર નંબર પ્લેટ ન હોવાથી પોલીસે તેને રોકવાનો પ્રયાસ કરતા ચાલકે ગાડી પૂરઝડપે ભગાવી હતી. બૂટલેગરે ભારતમાલા રોડ પર યુ-ટર્ન લઈ ફરી રાજસ્થાન તરફ ભાગવાનો પ્રયાસ કર્યો હતો, પરંતુ પોલીસે ફિલ્મી ઢબે પીછો કરતા ચાલક ગાડી રોડ પર જ મૂકી અંધારાનો લાભ લઈ ખેતરોમાં નાસી છૂટ્યો હતો. પોલીસે ગાડીની તલાશી લેતા તેમાંથી વિદેશી દારૂનો મોટો જથ્થો મળી આવ્યો હતો. પોલીસે દારૂ અને ગાડી સહિત કુલ ₹9,69,806/-નો મુદ્દામાલ જપ્ત કરી ફરાર ચાલક વિરુદ્ધ પ્રોહિબિશન એક્ટ હેઠળ ગુનો નોંધી વધુ તપાસ હાથ ધરી છે.