નેપાળમાં થયેલા વિનાશના નવા વીડિયો સામે આવી રહ્યા છે, અને બચાવ કામગીરી યુદ્ધના ધોરણે ચાલી રહી છે. આ દરમિયાન, એક આઘાતજનક અને હૃદયદ્રાવક વીડિયો સામે આવ્યો છે, જેણે સોશિયલ મીડિયા પર હડકંપ મચાવી દીધો છે. વિનાશક પૂરમાં તણાઈ ગયેલા મૃતદેહોમાંથી ઘરેણાં ચોરાઈ રહ્યાનો એક વીડિયો વાયરલ થઈ રહ્યો છે. ફૂટેજમાં, બે યુવાનો ભોટેકોશી નદીના કિનારે પૂર પીડિતના મૃતદેહમાંથી કાનની બુટ્ટી ચોરી કરતા જોવા મળે છે.
સોશિયલ મીડિયા પર આ વીડિયો ક્લિપ ઝડપથી વાયરલ થતાં, વ્યાપક આક્રોશ ફેલાયો. મહિલાના મૃતદેહમાંથી દાગીના ચોરી કરતા યુવાનોનો વીડિયો વાયરલ થયા બાદ નેપાળ પોલીસે કાર્યવાહી કરી છે. નેપાળ પોલીસે ચિતવનમાં 25 વર્ષીય મદન ગુરુંગ અને 38 વર્ષીય ઉમેશ ચૌધરીની ધરપકડ કરી છે. આ વીડિયો ક્લિપમાં નેપાળમાં આવેલી આપત્તિ પછી કિનારે તણાયેલી એક મહિલાનો મૃતદેહ જોવા મળે છે. મૃતદેહની નજીક બે યુવાનો દેખાય છે. તેઓ લાકડાના પાટિયા અને મહિલાના વાળનો ઉપયોગ કરીને મૃતદેહને પાણીમાંથી બહાર કાઢે છે. પછી તેઓ તેના બંને કાનમાંથી બુટ્ટી કાઢીને બાજુ પર રાખે છે, જ્યારે નજીકમાં ઉભેલા ઘણા લોકો આ ઘટનાનું ફિલ્માંકન કરતા જોઈ શકાય છે.
વીડિયો વાયરલ થયા બાદ તાત્કાલિક કાર્યવાહી કરવામાં આવી હતી. નેપાળ પોલીસે 41 સેકન્ડનો વીડિયો શેર કર્યો હતો અને જણાવ્યું હતું કે મૃતક મહિલાના કાનમાંથી કાનની બુટ્ટી ચોરી કરવાના આરોપમાં બે યુવાનોની અટકાયત કરવામાં આવી છે.
શર્મસાર કરતી ઘટના, પૂરમાં તણાઈને આવેલ લાશોના ઘરેણા ચોર્યા
