પાકિસ્તાન આર્મીનું એક તાલીમ વિમાન સોમવારે ટેકનિકલ ખામીને કારણે ક્રેશ થયું હતું, જેમાં બે પાઇલટ્સના મોત થયા હતા, એમ સેનાએ જણાવ્યું હતું.
આ ઘટના બલુચિસ્તાનના પ્રાંતીય પાટનગર ક્વેટા નજીક બની હતી. સેનાએ એક નિવેદનમાં જણાવ્યું હતું કે, "બપોરે, પાકિસ્તાન આર્મી એવિએશનનું એક મુશ્શાક તાલીમ વિમાન ટેકનિકલ ખામીને કારણે ક્વેટાના નવાન કિલી નજીક ક્રેશ થયું હતું." સેનાએ વધુમાં જણાવ્યું હતું કે બંને પાઇલટ - પ્રશિક્ષક મેજર હસનૈન શહઝાદ હુમાયુ અને વિદ્યાર્થી કેપ્ટન અબ્દુલ સમદ - "દુર્ભાગ્યપૂર્ણ દુર્ઘટના" માં મૃત્યુ પામ્યા હતા.
રાષ્ટ્રપતિ આસિફ અલી ઝરદારી અને વડા પ્રધાન શાહબાઝ શરીફે લશ્કરી પાઇલટ્સના મૃત્યુ પર શોક અને સંવેદના વ્યક્ત કરી હતી. જૂનની શરૂઆતમાં, પાકિસ્તાન અધિકૃત કાશ્મીરના મુઝફ્ફરાબાદ નજીક પાકિસ્તાન આર્મી એવિએશન Mi-17 હેલિકોપ્ટર ક્રેશ થયું હતું, જેમાં સવાર તમામ કર્મચારીઓના મોત થયા હતા.
