PM મોદી અને PM તાકાઈચી વચ્ચે મુલાકાત, AI સહીત મહત્વપૂર્ણ મુદ્દાઓ પર ચર્ચો

વડા પ્રધાન નરેન્દ્ર મોદીએ ગુરુવારે હૈદરાબાદ હાઉસ ખાતે જાપાનના વડા પ્રધાન સના તાકાઈચી સાથે દ્વિપક્ષીય વાટાઘાટો કરી. બંને નેતાઓ વચ્ચેની આ શિખર બેઠકમાં આર્થિક સહયોગ વધારવા, સેમિકન્ડક્ટર સપ્લાય ચેઇનને મજબૂત બનાવવા, મહત્વપૂર્ણ ટેકનોલોજી, કૃત્રિમ બુદ્ધિમત્તા (AI), સંરક્ષણ, સુરક્ષા અને રોકાણ સહિતના અનેક મુખ્ય મુદ્દાઓ પર વ્યાપક ચર્ચા થઈ. બેઠક પહેલા, જાપાનના વડા પ્રધાન સના તાકાઈચીનું રાષ્ટ્રપતિ ભવનના પ્રાંગણમાં ઔપચારિક સ્વાગત કરવામાં આવ્યું હતું અને તેમને ગાર્ડ ઓફ ઓનર આપવામાં આવ્યું હતું.


વિદેશ મંત્રાલયના પ્રવક્તા રણધીર જયસ્વાલે સોશિયલ મીડિયા પર જણાવ્યું હતું કે આ સમિટ ભારત અને જાપાન વચ્ચેના સંબંધોને નવી ગતિ આપવાના ઉદ્દેશ્યથી યોજાઈ હતી , જે વિશ્વાસ, સહિયારા મૂલ્યો અને વ્યૂહાત્મક ભાગીદારી પર આધારિત છે. બંને નેતાઓએ ભારત-જાપાન આર્થિક ભાગીદારીને વધુ મજબૂત બનાવવા પર ભાર મૂક્યો હતો. ચર્ચાઓ ખાસ કરીને સેમિકન્ડક્ટર, મહત્વપૂર્ણ ખનિજો, ફાર્માસ્યુટિકલ ઉદ્યોગ, AI, ઉભરતી તકનીકો અને મજબૂત સપ્લાય ચેઇન વિકસાવવા પર કેન્દ્રિત હતી.


જાપાનના વડા પ્રધાન સના તાકાઈચી 1 થી 3 જુલાઈ સુધી ભારતની ત્રણ દિવસની સત્તાવાર મુલાકાતે છે. આ મુલાકાત દરમિયાન, તેઓ 16મા ભારત-જાપાન વાર્ષિક શિખર સંમેલનમાં પણ ભાગ લેશે. આ શિખર સંમેલનમાં, બંને દેશો દ્વિપક્ષીય સંબંધોના તમામ પાસાઓની સમીક્ષા કરશે અને પ્રાદેશિક અને વૈશ્વિક મુદ્દાઓ પર ચર્ચા કરશે. વિદેશ મંત્રાલયના જણાવ્યા અનુસાર, આ મુલાકાતનો હેતુ વ્યૂહાત્મક, આર્થિક, તકનીકી અને સુરક્ષા સહયોગને વધુ મજબૂત બનાવવાનો છે.