પંજાબના પટિયાલામાં એક ટ્રેનમાં આગ લાગી. મળતી માહિતી મુજબ, રાજપુરા રેલ્વે સ્ટેશન નજીક સરાય બંજારા ગામ પાસે કર્મભૂમિ એક્સપ્રેસ ટ્રેનમાં આગ લાગી. ટ્રેનના ચાર ડબ્બા આગની લપેટમાં આવી ગયા. ટ્રેન અમૃતસરથી ન્યૂ જલપાઇગુડી જઈ રહી હતી. આગ લાગ્યા બાદ ટ્રેનને તાત્કાલિક રોકી દેવામાં આવી હતી. ડબ્બામાંથી ધુમાડો નીકળતો જોઈને મુસાફરોમાં ગભરાટ ફેલાઈ ગયો અને લોકો પોતાનો જીવ બચાવવા માટે ટ્રેનમાંથી નીચે ઉતરી ગયા. કહેવામાં આવી રહ્યું છે કે ઘણા લોકોએ પોતાનો સામાન છોડીને પોતાનો જીવ બચાવવા માટે ટ્રેનમાંથી કૂદી પડ્યા હતા. ઘટના બાદ સમગ્ર વિસ્તારમાં ધુમાડાના ગોટેગોટા જોવા મળ્યા હતા.
પ્રારંભિક માહિતી મુજબ, કેટલાક મુસાફરો ઘાયલ થયાના અહેવાલ છે. જોકે, ઉત્તર રેલવેના સીપીઆરઓ હિમાંશુ શેખર ઉપાધ્યાયે કોઈ જાનહાનિનો ઇનકાર કર્યો હતો. ઉત્તર રેલવેના સીપીઆરઓ હિમાંશુ શેખર ઉપાધ્યાયે જણાવ્યું હતું કે સલામતી વ્યવસ્થા સક્રિય થયા પછી ટ્રેન સરાઈ બંજારા સ્ટેશન નજીક સુરક્ષિત રીતે રોકાઈ ગઈ હતી. આગ પર કાબુ મેળવવાના પ્રયાસો ચાલુ છે. વરિષ્ઠ અધિકારીઓ ઘટનાસ્થળે હાજર છે, અને કોઈને ઈજા થઈ હોવાના કોઈ અહેવાલ નથી.
અહેવાલો અનુસાર, અમૃતસર અને ન્યુ જલપાઈગુડી વચ્ચે દોડતી ટ્રેન નંબર ૧૨૫૦૮ કર્મભૂમિ એક્સપ્રેસના પાંચમા કોચમાં આગ લાગી હતી. સૂત્રો સૂચવે છે કે આગનું કારણ શોર્ટ સર્કિટ હોઈ શકે છે. જોકે, હજુ સુધી આ વાતની સત્તાવાર પુષ્ટિ થઈ નથી. ઘટનાસ્થળ પરથી મળેલી તસવીરોમાં અનેક કોચમાંથી આગની જ્વાળાઓ અને ધુમાડાના ગોટેગોટા નીકળતા જોવા મળ્યા હતા, જેના કારણે રેલ્વે અધિકારીઓ અને કટોકટી કર્મચારીઓ ઘટના સ્થળે પહોંચ્યા હતા. સૂત્રોએ જણાવ્યું હતું કે અમૃતસરથી દોડી રહેલી ટ્રેનમાં બસંતપુરા રેલ્વે સ્ટેશન નજીક આગ લાગી હતી, જે એક ગામની નજીક અને રાજપુરાથી લગભગ ૧૫ કિલોમીટર દૂર સ્થિત છે. આ ઘટનામાં હજુ સુધી કોઈ ઈજા કે જાનહાનિના અહેવાલ નથી.
