કાળી પટ્ટી ધારણ કરી સરકાર સામે નોંધાવ્યો વિરોધ, વિવિધ માંગણીઓના નિરાકરણ માટે આંદોલનાત્મક કાર્યક્રમોની જાહેરાત
સરકારશ્રી અને ખેડૂતો વચ્ચેની કડીરૂપ મહત્વની ભૂમિકા ભજવતા ગ્રામસેવકો દ્વારા પોતાના સંવર્ગના વિવિધ પડતર પ્રશ્નોના નિરાકરણ માટે લાંબા સમયથી રજૂઆતો કરવામાં આવી રહી છે. તેમ છતાં વ્યાજબી, ન્યાયસંગત અને હકીકત આધારિત રજૂઆતોને પૂરતું મહત્વ આપવામાં ન આવતું હોવાના આક્ષેપ સાથે ગુજરાત રાજ્ય ગ્રામસેવક મહામંડળ દ્વારા સરકારશ્રીને પ્રશ્નોના નિરાકરણ માટે રજૂઆત કરવામાં આવી હતી.
મહામંડળ દ્વારા તા. ૦૧/૦૯/૨૦૨૬ના રોજ વિવિધ પડતર પ્રશ્નોના નિરાકરણ માટે સરકારને ૭ દિવસનું અલ્ટીમેટમ આપવામાં આવ્યું હતું. જોકે, આજદિન સુધી રજૂઆત અંગે કોઈ પ્રતિસાદ કે નિર્ણય ન મળતાં ગ્રામસેવક મહામંડળ દ્વારા વિવિધ તબક્કામાં આંદોલનાત્મક કાર્યક્રમો જાહેર કરવામાં આવ્યા છે. આ આંદોલનના પ્રથમ તબક્કાના ભાગરૂપે તા.૦૯/૦૯/૨૦૨૬ના રોજ ડીસા તાલુકાના ગ્રામસેવકોએ કાળી પટ્ટી ધારણ કરી ફરજ બજાવી સરકાર સામે વિરોધ નોંધાવ્યો હતો. ગ્રામસેવકોએ પોતાના પડતર પ્રશ્નોનો વહેલી તકે ન્યાયસંગત ઉકેલ લાવવા સરકાર સમક્ષ માંગ કરી હતી.
