ઇઝરાયલના એક જંગલમાં લાગી આગ, લોકોને સ્થળાંતર કરવાની ફરજ પડી

જેરુસલેમની બહારના વિસ્તારમાં ફેલાયેલી એક વિશાળ જંગલી આગને કારણે ઇઝરાયલમાં રાષ્ટ્રીય કટોકટી સર્જાઈ છે, જેના કારણે હજારો રહેવાસીઓને સ્થળાંતર કરવાની ફરજ પડી છે અને દેશની રાજધાની પર ધુમાડાના ગોટેગોટા ફેલાઈ ગયા છે. અધિકારીઓ દ્વારા દેશના ઇતિહાસમાં સૌથી મોટી આગ તરીકે વર્ણવવામાં આવી હતી, જે બુધવારે ઇઝરાયલમાં શહીદ સૈનિકોના સ્મારક દિવસ સાથે ફાટી નીકળી હતી અને શુષ્ક પરિસ્થિતિઓ અને ભારે પવનને કારણે તે ઝડપથી ફેલાઈ ગઈ છે. ઇઝરાયલી વડા પ્રધાન બેન્જામિન નેતન્યાહૂએ ચેતવણી આપી હતી કે ઝડપથી આગળ વધતી આગ જેરુસલેમ સુધી પહોંચી શકે છે, તેને ફક્ત સ્થાનિક નહીં પણ રાષ્ટ્રીય કટોકટી ગણાવી છે. તેમણે વધુ ફાયર એન્જિન અને ફાયરબ્રેકની જરૂરિયાત પર ભાર મૂકતા કહ્યું હતું કે, હાલમાં પ્રાથમિકતા જેરુસલેમનું રક્ષણ કરવાની છે. અગ્નિશામકો આગ પર કાબુ મેળવી રહ્યા હતા ત્યારે હાઇવે ઉપર ગાઢ ધુમાડો છવાઈ ગયો હતો, જેમાં સ્થળાંતર અને બચાવ પ્રયાસોમાં મદદ કરવા માટે સૈન્ય તૈનાત કરવામાં આવ્યું હતું. ઇઝરાયલની કટોકટી તબીબી સેવા, મેગેન ડેવિડ એડોમ (MDA) એ જણાવ્યું હતું કે તેણે અત્યાર સુધીમાં 23 લોકોની સારવાર કરી છે, જેમાં 13 લોકો દાઝી ગયા હતા અને ધુમાડો શ્વાસમાં લેવાથી હોસ્પિટલમાં દાખલ થયા હતા. એજન્સીએ ચેતવણી આપી હતી કે સેંકડો નાગરિકો વર્ષોની સૌથી ભયાનક જંગલી આગથી જોખમમાં છે. આગના કારણે અધિકારીઓને તેલ અવીવથી જેરુસલેમને જોડતા મુખ્ય હાઇવે રૂટ 1 બંધ કરવાની ફરજ પડી હતી. રહેવાસીઓ તેમના વાહનો છોડીને પગપાળા ભાગી ગયા હતા અને રસ્તા પર આગ લાગી હતી, જેના કારણે અંધાધૂંધી ફેલાઇ હતી.