બનાસકાંઠાને અછતગ્રસ્ત જાહેર કરો: કિસાન સંઘની કલેક્ટરને રજૂઆત

સર્વે કરી સહાય:પાક ધિરાણ માફ:તળાવો ભરવાની માંગ

મેઘરાજાની મહેર ન થતાં બનાસકાંઠાના ખેડૂતોની ચિંતામાં વધારો થયો છે. ચોમાસાની સિઝન અડધીથી વધુ પસાર થઈ હોવા છતાં જિલ્લામાં પૂરતો વરસાદ ન પડતાં ખેતીના પાક સામે સંકટ ઊભું થયું છે. ક્યાંક ખેતરોમાં ભેજ નથી તો ક્યાંક તળાવો હજુ કોરા છે. વરસાદની અછતથી ખેડૂતો અને પશુપાલકોની મુશ્કેલી વધી રહી છે ત્યારે ભારતીય કિસાન સંઘે હવે સરકાર સમક્ષ અછત જાહેર કરવાની જોરદાર માંગ ઉઠાવી છે.

કિસાન સંઘના આગેવાનો દ્વારા જિલ્લા કલેક્ટરને આવેદનપત્ર આપવામાં આવ્યું હતું. કિસાન સંઘના અગ્રણી માવજીભાઈ લોહના જણાવ્યા મુજબ, ચાલુ ચોમાસામાં જિલ્લામાં સરેરાશ માત્ર 6થી 7 ઇંચ જેટલો વરસાદ થયો છે. વરસાદના અભાવે પાકને પૂરતું પાણી મળતું નથી અને ખેડૂતોનો પાક બચાવવો મુશ્કેલ બની રહ્યો છે. બીજી તરફ પશુધન માટે પણ પાણી અને ઘાસચારાની સમસ્યા ગંભીર બની શકે તેવી સ્થિતિ છે.