પશ્ચિમ બંગાળ ચૂંટણી માટે ભાજપે 144 ઉમેદવારોની યાદી જાહેર કરી, મમતા સામે સુવેન્દુ અધિકારીને ટિકિટ મળી

ભારતીય જનતા પાર્ટીએ પશ્ચિમ બંગાળ વિધાનસભા ચૂંટણી માટે 144 ઉમેદવારોની પહેલી યાદી જાહેર કરી છે. ભાજપે મુખ્યમંત્રી મમતાની બેઠક પરથી તેના ફાયરબ્રાન્ડ નેતા સુવેન્દુ અધિકારીને ટિકિટ આપી છે. મમતા બેનર્જી ભવાનીપુરના ધારાસભ્ય છે અને સુવેન્દુ અધિકારીને આ બેઠક પરથી ટિકિટ આપવામાં આવી છે. આ સાથે, તેઓ નંદીગ્રામથી પણ ચૂંટણી લડશે, જ્યાંથી તેઓ વર્તમાન ધારાસભ્ય છે. 294 વિધાનસભા બેઠકો ધરાવતા પશ્ચિમ બંગાળમાં વિધાનસભા ચૂંટણી બે તબક્કામાં યોજાવાની છે. ૨૩ એપ્રિલે પ્રથમ તબક્કામાં 152 બેઠકો પર મતદાન થશે. જ્યારે બીજા તબક્કામાં 29 એપ્રિલે 142 બેઠકો પર મતદાન થશે. ભાજપે 144 બેઠકો માટે ઉમેદવારોના નામ જાહેર કર્યા છે. ભારતીય જનતા પાર્ટીની કેન્દ્રીય ચૂંટણી સમિતિની બેઠક 12 માર્ચે નીતિન નવીનની અધ્યક્ષતામાં મળી હતી. આ બેઠકમાં વડા પ્રધાન નરેન્દ્ર મોદી, સંરક્ષણ પ્રધાન રાજનાથ સિંહ, ગૃહ પ્રધાન અમિત શાહ અને કેન્દ્રીય ચૂંટણી સમિતિના અન્ય તમામ સભ્યો હાજર રહ્યા હતા. કેન્દ્રીય ચૂંટણી સમિતિએ 2026ની પશ્ચિમ બંગાળ વિધાનસભા ચૂંટણી માટે આ 144 ઉમેદવારોના નામોને મંજૂરી આપી હતી. તેમાં 11 મહિલાઓનો સમાવેશ થાય છે. ભાજપે મુસ્લિમ બહુમતી ધરાવતા મુર્શિદાબાદ મતવિસ્તારમાંથી ગૌરી શંકર ઘોષને ટિકિટ આપી છે. ટીએમસીના બળવાખોર ધારાસભ્ય હુમાયુ કબીર અહીં નવી બાબરી મસ્જિદ બનાવી રહ્યા છે. તેમણે એક નવી પાર્ટી પણ બનાવી છે. પરિણામે, આ બેઠક સતત ચર્ચામાં રહે છે.