બનાસકાંઠા: પડતર માંગણીઓ ન સંતોષાતા ગ્રામસેવકો મેદાને, કલેક્ટરને આવેદન આપ્યું

ગુજરાત રાજ્ય ગ્રામસેવક મહામંડળની સરકારને ચીમકી : 2 ઓક્ટોબરથી અચોક્કસ મુદતની હડતાળ

ગુજરાત રાજ્ય ગ્રામસેવક મહામંડળ દ્વારા ગ્રામસેવક કેડરના લાંબા સમયથી પડતર પ્રશ્નોનું નિરાકરણ લાવવા સરકાર સમક્ષ રજૂઆત કરવામાં આવી હોવા છતાં કોઈ સંતોષકારક નિર્ણય ન લેવાતા ગ્રામસેવકોમાં ભારે રોષ જોવા મળી રહ્યો છે. ત્યારે આજે બનાસકાંઠાના ગ્રામ સેવકોએ કલેકટરને આવેદન પત્ર આપી ન્યાયની ગુહાર લગાવી હતી.

મહામંડળ દ્વારા અગાઉ આપવામાં આવેલા આવેદન પત્રની મુદત પૂર્ણ થઈ ગઈ હોવા છતાં સરકાર કે સંબંધિત વિભાગ દ્વારા પ્રશ્નોના ઉકેલ માટે કોઈ સંવાદ સાધવામાં આવ્યો નથી. જેના પગલે હવે ગ્રામસેવક મહામંડળે તબક્કાવાર આંદોલનાત્મક કાર્યક્રમ જાહેર કર્યો છે.મહામંડળે રજૂઆતમાં જણાવ્યું છે કે, ગ્રામસેવક કેડરની કામગીરી સાથે અન્ય કેડરની કામગીરીનો પણ બોજ મૂકવામાં આવી રહ્યો છે, જેના કારણે ગ્રામસેવકો પર કામનું ભારણ વધી રહ્યું છે. ઉપરાંત લાંબા સમયથી પડતર વિવિધ પ્રશ્નો, કર્મચારીઓને મળવા પાત્ર લાભો સમયસર આપવા સહિતની માંગણીઓનું નિરાકરણ લાવવામાં આવ્યું નથી.

મહામંડળના જણાવ્યા મુજબ ગ્રામસેવક કર્મચારીઓના પ્રશ્નોને લઈને અગાઉ સરકાર અને સંબંધિત વહીવટી તંત્ર સમક્ષ રજૂઆતો કરવામાં આવી હતી. તેમ છતાં પ્રશ્નોની સતત અવગણના થતી હોવાના આક્ષેપ સાથે મહામંડળે હવે આંદોલનનો માર્ગ અપનાવવાનો નિર્ણય કર્યો છે. મહામંડળે સરકારને તાત્કાલિક ગ્રામસેવકોના પડતર પ્રશ્નોનું યોગ્ય નિરાકરણ લાવવા અને કર્મચારીઓ સાથે સંવાદ સાધવાની માંગ કરી છે. સાથે જ આંદોલન દરમિયાન કૃષિ તથા ગ્રામ્ય ક્ષેત્રને લગતી કામગીરીને અસર થશે તો તેની સંપૂર્ણ જવાબદારી સરકાર તથા સંબંધિત વહીવટી તંત્રની રહેશે તેવી ચીમકી પણ ઉચ્ચારવામાં આવી છે.