અમેરિકા અને ઈરાન વચ્ચેનો સીધો લશ્કરી મુકાબલો ખૂબ જ ખતરનાક તબક્કે પહોંચી ગયો છે. જો સંયમ નહીં રાખવામાં આવે તો પરિસ્થિતિ વધુ વણસી શકે છે. છેલ્લા બે અઠવાડિયામાં આ લશ્કરી મુકાબલામાં લગભગ 100 અમેરિકી સૈનિકો ઘાયલ થયા છે. દરેક સૈનિક ઘાયલ થતાં ટ્રમ્પનો ગુસ્સો વધી રહ્યો છે, અને તેઓ ઈરાનને પાઠ ભણાવવાની સતત ધમકી આપી રહ્યા છે.
દરમિયાન, પેન્ટાગોન (યુએસ સંરક્ષણ મંત્રાલય) એ સત્તાવાર રીતે પુષ્ટિ આપી છે કે છેલ્લા બે અઠવાડિયામાં (૭ જુલાઈથી) ઈરાન દ્વારા ચાલી રહેલા ભીષણ હુમલાઓ અને બદલામાં લગભગ ૧૦૦ યુએસ સૈનિકો ઘાયલ થયા છે. આમાંના મોટાભાગના સૈનિકોને હુમલા દરમિયાન માથામાં ઈજા થઈ હતી. જેમ જેમ ઈરાન અને અમેરિકા વચ્ચે સંઘર્ષ વધી રહ્યો છે, તેમ તેમ મધ્ય પૂર્વના ઘણા અન્ય દેશો પણ તેની અસર અનુભવી રહ્યા છે.
પેન્ટાગોન અનુસાર, યુએસ સેનાએ સોમવાર મોડી રાત્રે અને મંગળવાર વહેલી સવારની વચ્ચે ઈરાન પર 10મા રાઉન્ડના હવાઈ હુમલા કર્યા, જેમાં ઈરાની લશ્કરી કમાન્ડ સેન્ટરો અને નૌકાદળ ક્ષમતાઓને નિશાન બનાવવામાં આવી.
દરમિયાન, ઈરાનના રાજ્ય મીડિયાએ દેશના દક્ષિણમાં આવેલા હોર્મોઝગન પ્રાંતના બંદર અબ્બાસ, કેશ્મ અને બેમાની જિલ્લામાં અનેક શક્તિશાળી વિસ્ફોટોની પુષ્ટિ કરી છે . ઈરાનના રાષ્ટ્રપતિએ સ્વીકાર્યું છે કે દેશ હાલમાં સંપૂર્ણ યુદ્ધમાં ફસાઈ ગયો છે, જેની અસર તેના અર્થતંત્ર પર પણ પડી રહી છે.





