વિશ્વભરના યુવા ખેલાડીઓને ફરી એકવાર મહિલા ક્રિકેટમાં પોતાની પ્રતિભા દર્શાવવા માટે એક મોટું પ્લેટફોર્મ મળવા જઈ રહ્યું છે. ICC અંડર-19 મહિલા T20 વર્લ્ડ કપ 2027નું શેડ્યૂલ જાહેર કરવામાં આવ્યું છે. બાંગ્લાદેશ અને નેપાળ સંયુક્ત રીતે આવતા વર્ષે યોજાનારી આ ટુર્નામેન્ટનું આયોજન કરશે. 21 જાન્યુઆરીથી શરૂ થનારા આ વર્લ્ડ કપમાં 16 ટીમો ટાઇટલ માટે સ્પર્ધા કરશે. ડિફેન્ડિંગ ચેમ્પિયન ભારત વેસ્ટ ઇન્ડીઝ સામે પોતાનું અભિયાન શરૂ કરશે. આ 2023 માં શરૂ થયેલી આ ટુર્નામેન્ટની ત્રીજી આવૃત્તિ હશે. આગામી વર્લ્ડ કપમાં કુલ 41 મેચ રમાશે, જે બંને દેશોના ચાર મેદાન પર આયોજિત થશે.
ટુર્નામેન્ટમાં ભાગ લેતી ટીમોને ચાર ગ્રુપમાં વહેંચવામાં આવી છે, જેમાં દરેક ગ્રુપમાં ચાર ટીમોનો સમાવેશ થાય છે. ભારત અને પાકિસ્તાનને એક જ ગ્રુપમાં મૂકવામાં આવ્યા નથી. ગ્રુપ A માં ભારત, આયર્લેન્ડ, વેસ્ટ ઈન્ડિઝ અને યજમાન નેપાળનો સમાવેશ થાય છે. ગ્રુપ B માં દક્ષિણ આફ્રિકા, ન્યુઝીલેન્ડ, પાકિસ્તાન અને સમોઆનો સમાવેશ થાય છે. ગ્રુપ C માં ઓસ્ટ્રેલિયા, બાંગ્લાદેશ, નાઇજીરીયા અને સંયુક્ત આરબ અમીરાત (UAE)નો સમાવેશ થાય છે. ગ્રુપ D માં ઇંગ્લેન્ડ, શ્રીલંકા, યુનાઇટેડ સ્ટેટ્સ અને સ્કોટલેન્ડનો સમાવેશ થાય છે.
આ ટુર્નામેન્ટ 21 જાન્યુઆરીથી શરૂ થશે. શરૂઆતના દિવસે ચાર મેચ રમાશે, જેમાં આઠ ટીમો મેદાનમાં ઉતરશે. સહ-યજમાન બાંગ્લાદેશ UAE સામે પોતાના અભિયાનની શરૂઆત કરશે. નેપાળ 22 જાન્યુઆરીએ આયર્લેન્ડનો સામનો કરશે, જ્યારે ભારતીય ટીમ તે જ દિવસે વેસ્ટ ઈન્ડિઝ સામે પોતાની પહેલી મેચ રમશે.
વર્લ્ડ કપની મેચો બાંગ્લાદેશના ચટ્ટોગ્રામ અને સિલ્હટમાં તેમજ નેપાળની રાજધાની કાઠમંડુમાં રમાશે. બાંગ્લાદેશમાં, ચટ્ટોગ્રામમાં બીર શ્રેષ્ઠ શહીદ ફ્લાઇટ લેફ્ટનન્ટ મતીઉર રહેમાન ક્રિકેટ સ્ટેડિયમ અને સિલ્હટ ઇન્ટરનેશનલ ક્રિકેટ સ્ટેડિયમ મેચોનું આયોજન કરશે. નેપાળમાં, ટીયુ ઇન્ટરનેશનલ ક્રિકેટ સ્ટેડિયમ અને અપર મુલપાની ઇન્ટરનેશનલ ક્રિકેટ ગ્રાઉન્ડ મેચોનું આયોજન કરશે.
ગ્રુપ સ્ટેજની મેચો 26 જાન્યુઆરી સુધી ચાલશે. આગળના તબક્કામાં પહોંચનારી ટીમો સુપર સિક્સમાં જશે. આ તબક્કામાં, ટીમોને બે ગ્રુપમાં વહેંચવામાં આવશે. દરેક ગ્રુપમાંથી ટોચની બે ટીમો સેમિફાઇનલમાં પહોંચશે. સેમિફાઇનલ મેચો 4 ફેબ્રુઆરીએ ચટ્ટોગ્રામના બીર શ્રેષ્ઠ શહીદ ફ્લાઇટ લેફ્ટનન્ટ મતીઉર રહેમાન ક્રિકેટ સ્ટેડિયમ ખાતે રમાશે. 5 ફેબ્રુઆરી આ ઇવેન્ટ માટે રિઝર્વ ડે છે. 6 ફેબ્રુઆરીએ ફાઇનલ રમાશે. 7 ફેબ્રુઆરી ફાઇનલ માટે રિઝર્વ ડે રહેશે.
