બનાસકાંઠા જિલ્લા મુખ્યાલય પાલનપુર નજીક આવેલા દેવપુરા જોડનાપુરા પાસેના બ્રિજ પર દોડતા દૂધના ટેન્કરમાં અચાનક આગ લાગવાની ઘટના સામે આવી છે. આગ લાગતા હાઇવે પર થોડા સમય માટે અફરાતફરી નો માહોલ સર્જાયો હતો. પ્રાપ્ત માહિતી અનુસાર, ડીસા હાઇવે પર દેવપુરા બ્રિજ પરથી જઈ રહેલા દૂધના ટેન્કરમાં અચાનક આગ ભભૂકી ઊઠતા વાહનચાલકોમાં દોડધામ મચી ગઈ હતી. ઘટનાની જાણ તાત્કાલિક પાલનપુર ફાયર વિભાગને કરવામાં આવી હતી.
જાણ થતાં જ ફાયર વિભાગની ટીમ ઘટના સ્થળે પહોંચવા રવાના થઈ હતી અને આગ પર કાબૂ મેળવવાની કામગીરી હાથ ધરી હતી. આગ લાગવાનું ચોક્કસ કારણ હજુ સુધી જાણવા મળ્યું નથી. સદનસીબે ઘટનામાં કોઈ જાનહાનિ થઈ હોવાની માહિતી સામે આવી નથી. જોકે આગના કારણે ટેન્કરને નુકસાન પહોંચ્યું હોવાનું જાણવા મળ્યું છે. સમગ્ર ઘટનાને લઈને વધુ તપાસ હાથ ધરવામાં આવી છે.
