દેશની અગ્રણી ઓટોમોબાઈલ ઉત્પાદક કંપની મારુતિ સુઝુકી ઈન્ડિયા તેના પસંદગીના મોડેલોના ભાવમાં ₹20,000 સુધીનો વધારો કરવા જઈ રહી છે. મારુતિએ સોમવારે ભાવ વધારાની જાહેરાત કરી હતી. કંપનીએ જણાવ્યું હતું કે વધેલી કિંમતો આ મહિનાથી અમલમાં આવશે.
નોંધનીય છે કે મે મહિના પછી મારુતિ કારના ભાવમાં આ ત્રીજો વધારો હશે . કંપનીએ આ માટે વધતા ખર્ચ અને ફુગાવાના દબાણને જવાબદાર ગણાવ્યું છે. અગાઉના બે ભાવ વધારા બધા મોડેલો પર લાગુ હતા.
મારુતિ સુઝુકી ઇન્ડિયાએ સ્ટોક એક્સચેન્જ ફાઇલિંગમાં જણાવ્યું હતું કે, "કાચા માલના ખર્ચમાં સતત વધારાને ધ્યાનમાં રાખીને, કંપનીએ પસંદગીના મોડેલોના ભાવમાં 20,000 રૂપિયા સુધીનો વધારો કરવાનો નિર્ણય લીધો છે. આ ભાવ વધારો સપ્ટેમ્બર 2026 થી અમલમાં આવશે." કંપનીએ જણાવ્યું હતું કે તે છેલ્લા કેટલાક મહિનાઓથી ખર્ચ ઘટાડવાના પગલાં દ્વારા વધેલા ખર્ચની અસરને શક્ય તેટલી ઓછી કરવાનો સતત પ્રયાસ કરી રહી છે.
મારુતિ સુઝુકી ઇન્ડિયાએ જણાવ્યું હતું કે, "જોકે, ફુગાવાનું દબાણ ઊંચું રહે છે અને ખર્ચનું પ્રતિકૂળ વાતાવરણ યથાવત રહે છે. પરિણામે, કંપનીને આ વધેલા ખર્ચનો એક ભાગ બજારને આપવાની ફરજ પડી છે. તે જ સમયે, ગ્રાહકો પર અસર ઓછામાં ઓછી થાય તે સુનિશ્ચિત કરવાના પ્રયાસો ચાલી રહ્યા છે."
