આસામમાં પૂરે તબાહી મચાવી! 7 જિલ્લામાં ઘરો ડૂબી ગયા, 24 કલાકમાં વધુ 7 લોકોના મોત

છેલ્લા 24 કલાકમાં પૂરને કારણે આસામમાં વધુ સાત લોકોના મોત થયા છે. આસામમાં હજુ પણ 3.32 લાખ લોકો પૂરથી પ્રભાવિત છે. અધિકારીઓએ જણાવ્યું હતું કે આસામમાં ચોમાસા દરમિયાન પૂરની ઘટનાઓમાં અત્યાર સુધીમાં 75 લોકોએ જીવ ગુમાવ્યા છે. તેમણે કહ્યું કે આસામ સરકારે મૃતકોના પરિવારોને આપવામાં આવતી સહાય રકમ વધારીને 9 લાખ રૂપિયા કરી દીધી છે. ઉપરાંત, વળતર મેળવવાના નિયમોમાં પણ છૂટછાટ આપવામાં આવી છે.

આસામના અધિકારીઓએ જણાવ્યું હતું કે શિવસાગર, ગોલાઘાટ, જોરહાટ, ચરાઈદેવ, નાગાંવ, સોનિતપુર અને કામરૂપ મેટ્રોપોલિટન સહિત સાત જિલ્લાઓ હજુ પણ પૂરની ઝપેટમાં છે. 21 મહેસૂલ વિભાગો અને 622 ગામડાઓ પ્રભાવિત થયા છે. પૂરથી પ્રભાવિત લોકોની સંખ્યા વધીને 3.32 લાખ થઈ ગઈ છે.
એ નોંધવું જોઈએ કે આસામનો ચરાઈદેવ જિલ્લો સૌથી વધુ અસરગ્રસ્ત છે, જ્યાં 1.42 લાખ લોકો અસરગ્રસ્ત છે. ત્યારબાદ શિવસાગરમાં 97,074 લોકો અને જોરહાટમાં 57,371 લોકો પૂરથી પ્રભાવિત થયા છે. અધિકારીઓના જણાવ્યા અનુસાર, ગયા મંગળવારે શિવસાગર જિલ્લાના નઝીરા મહેસૂલ વર્તુળમાં સાત લોકોએ જીવ ગુમાવ્યા હતા. આ સાથે આ વર્ષે આસામમાં પૂરને કારણે મૃત્યુ પામેલા લોકોની કુલ સંખ્યા 75 થઈ ગઈ છે.

અધિકારીઓના જણાવ્યા અનુસાર, આસામના અસરગ્રસ્ત જિલ્લાઓમાં 81 રાહત શિબિરો કાર્યરત છે, જ્યાં 32,477વિસ્થાપિત લોકો પહોંચ્યા છે. આ ઉપરાંત, 34 રાહત સામગ્રી વિતરણ કેન્દ્રો પણ કાર્યરત છે. સેના, ભારતીય વાયુસેના, NDRF, SDRF, અગ્નિશમન વિભાગ, કટોકટી સેવાઓ અને સ્વયંસેવકો સહિત અનેક એજન્સીઓ સતત બચાવ કામગીરીમાં રોકાયેલા છે.