દિવાળીના તહેવાર પૂર્વે ગુજરાતના રેલવે પ્રવાસીઓ માટે ખુશીના સમાચાર સામે આવ્યા છે. વડાપ્રધાન નરેન્દ્ર મોદીએ ગુજરાતને બે નવી ટ્રેનોની ભેટ આપી છે. જેમાં સાબરમતી-વારાણસી એક્સપ્રેસ અને સાબરમતી-મહેસાણા મેમુ ટ્રેનનો સમાવેશ થાય છે. વડાપ્રધાને વીડિયો કોન્ફરન્સિંગના માધ્યમથી આ બંને ટ્રેનોને લીલીઝંડી આપીને પ્રસ્થાન કરાવ્યું હતું.
આ નવી ટ્રેન સેવા શરૂ થવાથી ઉત્તર ગુજરાત અને દેશના અન્ય મહત્વપૂર્ણ ભાગો વચ્ચેનું કનેક્ટિવિટી વધુ મજબૂત બનશે. ખાસ કરીને વારાણસી જનારા શ્રદ્ધાળુઓ અને દૈનિક મુસાફરી કરતા નોકરીયાતો તથા વેપારીઓને મોટી રાહત મળશે. તહેવારોની મોસમમાં રેલવે પ્રવાસીઓની વધતી ભીડ વચ્ચે આ સુવિધા અત્યંત ઉપયોગી સાબિત થશે.
