પુતિને ઈરાન-ઈઝરાયલ યુદ્ધ વિશે મોટી વાત કહી, આ મુદ્દા પર નેતન્યાહૂ સાથે સંમત થયા

ઈરાન અને ઈઝરાયલ વચ્ચેનું યુદ્ધ દિવસેને દિવસે વધુ ઘાતક બની રહ્યું છે. ઈરાને સ્પષ્ટપણે શરણાગતિ સ્વીકારવાનો ઇનકાર કરી દીધો છે, જ્યારે ઈઝરાયલે ઈરાન સાથે કોઈપણ પ્રકારની વાતચીત કરવાનો પણ ઇનકાર કરી દીધો છે. હવે રશિયાના રાષ્ટ્રપતિ વ્લાદિમીર પુતિને આ યુદ્ધના મુદ્દા પર એક મોટું નિવેદન બહાર પાડ્યું છે. પુતિને ઈઝરાયલ અને ઈરાન વચ્ચેના યુદ્ધને સમાપ્ત કરવા માટે મધ્યસ્થી કરવાની ઓફર કરી છે. આ ઉપરાંત, પુતિને એમ પણ કહ્યું છે કે તેઓ ઈઝરાયલી નેતાઓ સાથે સંમત છે કે તેમની સુરક્ષા સુનિશ્ચિત થવી જોઈએ. હકીકતમાં, રશિયન રાષ્ટ્રપતિ પુતિને બુધવારે આંતરરાષ્ટ્રીય સમાચાર એજન્સીઓના વરિષ્ઠ પત્રકારો સાથે બેઠક યોજી હતી. આ બેઠક દરમિયાન પુતિને કહ્યું કે રશિયા એક એવો કરાર કરી શકે છે જેના મુજબ ઈરાનનો પરમાણુ કાર્યક્રમ શાંતિપૂર્ણ રીતે આગળ વધી શકે અને ઇઝરાયલની સુરક્ષા ચિંતાઓ પણ ઓછી થઈ શકે. પુતિને કહ્યું કે આ એક સંવેદનશીલ મુદ્દો છે અને મારા મતે, તેનો ઉકેલ શોધી શકાય છે. રશિયાએ ઈરાન, ઈઝરાયલ અને અમેરિકા સાથે પોતાનો પ્રસ્તાવ શેર કર્યો છે. અમે કોઈના પર કંઈ લાદી રહ્યા નથી; ફક્ત આ પરિસ્થિતિમાંથી બહાર નીકળવાનો સંભવિત રસ્તો કેવી રીતે શોધી શકાય તે વિશે વાત કરી રહ્યા છીએ. પરંતુ, અલબત્ત, આ નિર્ણય આ બધા દેશોના રાજકીય નેતૃત્વ પર નિર્ભર છે, મુખ્યત્વે ઈરાન અને ઈઝરાયલ, તેવું તેમણે કહ્યું હતું.