પાકિસ્તાનમાં સ્વતંત્રતાની ઉજવણી દરમિયાન અંધાધૂંધ ગોળીબાર, 3 લોકોના મોત અને 60 થી વધુ ઘાયલ

પાકિસ્તાન 14 ઓગસ્ટે પોતાનો સ્વતંત્રતા દિવસ ઉજવી રહ્યું છે. સ્વતંત્રતાની ઉજવણી દરમિયાન કરાચી શહેરમાં દુ:ખદ ઘટનાઓ બની છે. સ્વતંત્રતા દિવસની ઉજવણી દરમિયાન થયેલા ગોળીબારમાં 3 લોકોના મોત થયા છે, જેમાં એક 8 વર્ષની બાળકી અને એક વૃદ્ધ નાગરિકનો સમાવેશ થાય છે. ગોળીબારમાં 60 થી વધુ લોકો ઘાયલ પણ થયા છે. જિયો ન્યૂઝે એક અધિકારીને ટાંકીને આ સમાચાર આપ્યા છે. સ્વતંત્રતા દિવસની ઉજવણી દરમિયાન શહેરભરમાં ગોળીબારની ઘટનાઓ બની હતી. અહીં અઝીઝાબાદમાં એક છોકરીને ગોળી વાગી હતી અને કોરંગીમાં સ્ટીફન નામના વ્યક્તિનું પણ મોત થયું હતું. જિયો ન્યૂઝના અહેવાલ મુજબ, શહેરભરમાં આ ઘટનાઓમાં ઓછામાં ઓછા 64 અન્ય લોકો ઘાયલ થયા છે. અધિકારીઓએ આવી ઘટનાઓને ખતરનાક અને બેદરકારીનું પરિણામ ગણાવી છે. આ સમય દરમિયાન, લોકોને સલામત રીતે સ્વતંત્રતા દિવસની ઉજવણી કરવાની પણ અપીલ કરવામાં આવી છે. પોલીસના જણાવ્યા અનુસાર, કરાચીના લિયાકતાબાદ, કોરંગી, લ્યારી, મહમૂદાબાદ, અખ્તર કોલોની, કેમરી, જેક્સન, બલદિયા, ઓરંગી ટાઉન અને પાપોશ નગર જેવા વિસ્તારોમાં ગોળીબારની ઘટનાઓ બની છે. આ ઉપરાંત શરીફાબાદ, નઝામાબાદ, સુરજની ટાઉન, ઝમાન ટાઉન અને લાંધી જેવા વિસ્તારોમાં પણ ગોળીબાર થયો છે. પાકિસ્તાનમાં સ્વતંત્રતા દિવસની ઉજવણી દરમિયાન દર વર્ષે ગોળીબારની ઘટનાઓ બને છે. 2024માં પણ આવી જ ઘટના નોંધાઈ હતી. આમાં એક બાળકનું મોત થયું હતું અને 95 થી વધુ લોકો ઘાયલ થયા હતા.