આગામી પાંચ વર્ષમાં વીજ માંગમાં વધારો થવાની શક્યતા…!!

આગામી પાંચ વર્ષમાં દેશમાં વીજળીની માંગમાં નોંધપાત્ર વધારો થવાની શક્યતા છે, જેમાં આર્ટિફિશિયલ ઇન્ટેલિજન્સ (AI) ક્ષેત્રનો મોટો ફાળો રહેશે. વર્ષ ૨૦૨૫થી ૨૦૩૦ના ગાળામાં ભારતની કુલ વીજ માંગ ક્રમિક રીતે વધી ૮૧૭ ટ્રિલિયન વોટ અવર્સ સુધી પહોંચવાની ધારણા વ્યક્ત કરવામાં આવી છે. આ વધારામાંથી આશરે ૨૦% માંગ માત્ર એઆઈ સંબંધિત વર્કલોડ, ખાસ કરીને ડેટા સેન્ટરોને કારણે ઉભી થશે એમ એક રિપોર્ટમાં જણાવાયું છે. રિપોર્ટ મુજબ એઆઈ ક્ષેત્રની વીજ માંગ વર્ષ ૨૦૩૦ પછી પણ ઊંચી જ રહેવાની સંભાવના છે, કારણ કે તે સમય સુધી દેશમાં ડેટા ક્ષમતામાં જોરદાર વધારો થઈ ચૂક્યો હશે.

અગાઉના અંદાજમાં ૨૦૩૦માં વીજ માંગ ૬૬૧ ટ્રિલિયન વોટ અવર્સ રહેવાની ધારણા હતી, પરંતુ એઆઈ અને ડિજિટલ માળખાંના ઝડપી વિસ્તરણને કારણે હવે આ અંદાજ વધુ વધ્યો છે. આગામી પાંચ વર્ષમાં ભારતની કુલ વીજ માંગમાં થતો વધારો અમેરિકા અને યુરોપની સરખામણીએ લગભગ ૩૦% વધુ રહેવાની શક્યતા છે. જો કે આ દેશોમાં પણ ડેટા સેન્ટર, ક્લાઉડ કમ્પ્યુટિંગ અને એઆઈના વધતા ઉપયોગને કારણે વીજ માંગ ઝડપથી વધી રહી છે.

માઇક્રોસોફ્ટ, એમેઝોન અને ગુગલ જેવી વૈશ્વિક ટેક કંપનીઓ દ્વારા ભારતમાં એઆઈ અને ડેટા સેન્ટર ક્ષેત્રે કરવામાં આવેલા જંગી રોકાણની જાહેરાતોએ વીજ માંગ વધવાની ધારણાને વધુ મજબૂત બનાવી છે. રિપોર્ટ મુજબ ૨૦૨૫થી આગામી પાંચ વર્ષમાં ભારતમાં ડેટા ક્ષમતામાં પાંચ ગણો વધારો થવાની સંભાવના છે. ઇન્ટરનેટ વપરાશ, ડિજિટલ ટ્રાન્ઝેક્શન, મોબાઇલ ડેટા અને ક્લાઉડ સર્વિસિસના ઝડપી વિસ્તરણને કારણે ડેટા પ્રોસેસિંગની જરૂરિયાત સતત વધી રહી છે. આ પરિબળો સાથે એઆઈનો વ્યાપ વધતા, આવનારા વર્ષોમાં વીજ ક્ષેત્ર માટે નવી પડકારો અને તકો ઉભી થવાની સંભાવના છે.