એક દિવસના વિરામ બાદ ફરી શરૂ થઈ અમરનાથ યાત્રા; 9 ઓગસ્ટના રોજ સમાપ્ત થશે

શુક્રવારે અમરનાથ યાત્રા ફરી શરૂ થઈ. જમ્મુથી 7900 થી વધુ યાત્રાળુઓનો સમૂહ અમરનાથ ગુફા માટે રવાના થયો. જમ્મુ અને કાશ્મીરમાં ભારે વરસાદ અને ભૂસ્ખલનને કારણે અમરનાથ યાત્રા એક દિવસ માટે રોકી દેવામાં આવી હતી. પરંતુ શુક્રવારથી યાત્રા ફરી શરૂ કરવામાં આવી હતી. દક્ષિણ કાશ્મીર હિમાલયમાં સ્થિત 3,880 મીટર ઊંચા અમરનાથ ગુફા મંદિરના બે બેઝ કેમ્પ માટે જમ્મુથી યાત્રાળુઓનો એક નવો સમૂહ રવાના થયો અધિકારીઓએ જણાવ્યું હતું કે યાત્રા કાશ્મીરના પહેલગામ અને બાલતાલના બે બેઝ કેમ્પથી પણ ફરી શરૂ થઈ હતી. સીઆરપીએફ અને પોલીસ કર્મચારીઓની સુરક્ષા હેઠળ સવારે 7,908 યાત્રાળુઓનો 16મો સમૂહ 261 વાહનોમાં બેઝ કેમ્પથી રવાના થયો હતો. તેમાં 5,957 પુરુષો, 1,613 મહિલાઓ, 26 બાળકો અને 310 સાધુ-સાધ્વીઓનો સમાવેશ થતો હતો. આ યાત્રા 9 ઓગસ્ટના રોજ સમાપ્ત થશે; અત્યાર સુધીમાં, 4 લાખથી વધુ લોકોએ યાત્રા માટે ઓનલાઈન નોંધણી કરાવી છે. ગયા વર્ષે, 5.10 લાખથી વધુ યાત્રાળુઓએ ગુફા મંદિરની મુલાકાત લીધી હતી, જ્યાં કુદરતી રીતે બનેલા બરફના શિવલિંગ સ્થિત છે. 38 દિવસની આ યાત્રા 9 ઓગસ્ટના રોજ સમાપ્ત થશે. અધિકારીઓએ જણાવ્યું હતું કે છેલ્લા 36 કલાકથી ખીણમાં ભારે વરસાદને કારણે ગુરુવારે જમ્મુ તેમજ પહેલગામ અને બાલતાલના બે બેઝ કેમ્પથી અમરનાથ યાત્રા સ્થગિત કરવામાં આવી હતી.