રાજસ્થાન રોયલ્સના કેપ્ટન રિયાન પરાગ તાજેતરમાં IPL મેચ દરમિયાન ડ્રેસિંગ રૂમમાં ઈ-સિગારેટ પીતા જોવા મળ્યા હતા. તેમણે ન્યુ ચંદીગઢમાં પંજાબ કિંગ્સ સામેની મેચ દરમિયાન આ અયોગ્ય કૃત્ય કર્યું હતું. આ વીડિયો વાયરલ થયો હતો, જેના કારણે BCCIએ તેમની સામે કાર્યવાહી કરી હતી. હવે, પંજાબ કિંગ્સના સ્ટાર સ્પિનર યુઝવેન્દ્ર ચહલે પણ આવું જ કૃત્ય કર્યું છે, જેનાથી સોશિયલ મીડિયામાં ભારે હોબાળો મચી ગયો છે. સોશિયલ મીડિયા પર એક વીડિયો ઝડપથી વાયરલ થઈ રહ્યો છે, જેમાં યુઝવેન્દ્ર ચહલ ફ્લાઇટમાં ઇ-સિગારેટનો ઉપયોગ કરતા જોવા મળી રહ્યા છે. આ વીડિયો પંજાબ કિંગ્સ ટીમની ટ્રિપ દરમિયાન લેવામાં આવ્યો હોવાનું કહેવાય છે. ટીમે પોતે જ પોતાના ઓફિશિયલ એકાઉન્ટ પર આ વીડિયો શેર કર્યો છે, જેમાં ચહલને બેકગ્રાઉન્ડમાં કેદ કરવામાં આવ્યો છે. ટીમને ઘટનાની જાણ થતાં જ, વીડિયો દૂર કરવામાં આવ્યો હતો, પરંતુ ત્યાં સુધીમાં ઘણા યુઝર્સે તેને ડાઉનલોડ કરી લીધો હતો. આ ક્લિપ સોશિયલ મીડિયા પર ચર્ચાનો વિષય બની ગઈ છે, અને ક્રિકેટ ચાહકો પોતાની નારાજગી વ્યક્ત કરી રહ્યા છે.
ફ્લાઇટમાં ધૂમ્રપાન કરવું કે ઇ-સિગારેટનો ઉપયોગ કરવો સખત પ્રતિબંધિત છે. નિયમો અનુસાર, ફ્લાઇટમાં ઇલેક્ટ્રોનિક સિગારેટ લઈ જવી કે તેનો ઉપયોગ કરવો એ ગંભીર ઉલ્લંઘન માનવામાં આવે છે. આનાથી આગ લાગવાનું જોખમ ઊભું થાય છે, જે સમગ્ર વિમાન અને મુસાફરોની સલામતીને જોખમમાં મૂકે છે. જો ફરિયાદ દાખલ કરવામાં આવે છે, તો ખેલાડીને કાનૂની કાર્યવાહીનો સામનો કરવો પડી શકે છે અને તેને નો-ફ્લાય લિસ્ટમાં પણ મૂકવામાં આવી શકે છે.
રિયાન પરાગ બાદ હવે યુઝવેન્દ્ર ચહલનો વેપિંગ કરતો વિડીયો વાયરલ
