બંગાળની સરકારી શાળાઓ પછી, હવે તમામ મદરેસામાં પણ 'વંદે માતરમ' ફરજિયાત બનાવવાનો આદેશ

પશ્ચિમ બંગાળની નવી સરકાર ઝડપથી નિર્ણયો લઈ રહી છે. તમામ સરકારી અને સરકારી સહાયિત શાળાઓમાં "વંદે માતરમ" ફરજિયાત બનાવવામાં આવ્યું છે. મુખ્યમંત્રી સુવેન્દુ અધિકારીએ રાજ્યભરના તમામ મદરેસામાં રાષ્ટ્રગીત ગાવાનું ફરજિયાત બનાવ્યું છે. પશ્ચિમ બંગાળ સરકારના મદરેસા શિક્ષણ નિર્દેશાલયે આ જાહેરાત કરતો આદેશ જારી કર્યો છે. 

રાજ્યના લઘુમતી બાબતો અને મદરેસા શિક્ષણ મંત્રી ખુદીરામ ટુડુએ આ નિર્ણયની પુષ્ટિ કરી. તેમણે પૂછ્યું, "જો અન્ય સરકારી શાળાઓમાં અને સંથાલી ભાષામાં શિક્ષણ આપતી શાળાઓમાં 'વંદે માતરમ' ફરજિયાત છે, તો માન્યતા પ્રાપ્ત મદરેસામાં તેને ફરજિયાત કેમ ન બનાવવું જોઈએ?

સત્તાવાર આદેશમાં સ્પષ્ટપણે જણાવાયું છે કે આ નવો નિયમ તાત્કાલિક અસરથી લાગુ કરવામાં આવી રહ્યો છે, જે અગાઉના તમામ નિયમો અને પ્રથાઓને રદ કરે છે. તેના કાર્યક્ષેત્રમાં તમામ સરકારી મોડેલ મદરેસા (અંગ્રેજી માધ્યમ), માન્ય સહાયિત મદરેસા, માન્ય મદરેસા શિક્ષણ કેન્દ્રો, શિશુ શિક્ષા કેન્દ્રો અને લઘુમતી બાબતો અને મદરેસા શિક્ષણ વિભાગ હેઠળ માન્ય બિન-સહાયિત મદરેસાઓનો સમાવેશ થશે.

13 મી મેની સાંજે, પશ્ચિમ બંગાળ શિક્ષણ વિભાગે પણ રાજ્યભરની તમામ સરકારી શાળાઓમાં વંદે માતરમ ગાવાનું ફરજિયાત બનાવતું જાહેરનામું બહાર પાડ્યું હતું. રાજ્યના નવા અને નવમા મુખ્યમંત્રી, સુવેન્દુ અધિકારીએ ૧૪મી મેના રોજ તેમના સત્તાવાર સોશિયલ મીડિયા એકાઉન્ટ પર શિક્ષણ વિભાગની સૂચના શેર કરી હતી. નોંધનીય છે કે ફેબ્રુઆરી 2026 માં, કેન્દ્ર સરકારે વંદે માતરમને રાષ્ટ્રગીત (જન ગણ મન) ની સમાન દરજ્જો આપ્યો હતો.