પાકિસ્તાનના કોહાટ મસ્જિદમાં વિસ્ફોટ, 16 લોકોના મોત

પાકિસ્તાનના કોહાટમાં આજે (શુક્રવારે) એક મસ્જિદમાં વિસ્ફોટ થયો. આ વિસ્ફોટ શુક્રવારની નમાજ દરમિયાન થયો હતો. એક અધિકારીએ જણાવ્યું હતું કે આ પ્રચંડ બોમ્બ વિસ્ફોટમાં 16 લોકો માર્યા ગયા હતા અને ડઝનેક ઘાયલ થયા હતા. મૃતકોમાં 11 નાગરિકો અને 5 પોલીસકર્મીઓનો સમાવેશ થાય છે. આ વિસ્ફોટ ઉત્તરપશ્ચિમ પાકિસ્તાનના અશાંત ખૈબર પખ્તુનખ્વા પ્રાંતમાં થયો હતો.

પ્રાંતીય પોલીસ વડા ઝુલ્ફીકાર હમીદે જણાવ્યું હતું કે મસ્જિદમાં આત્મઘાતી બોમ્બર દ્વારા બોમ્બ વિસ્ફોટ કરવામાં આવ્યો હતો. આ ઘટના ખૈબર પખ્તુનખ્વાના પેશાવરથી 60 કિલોમીટર દૂર કોહાટમાં ઓલ્ડ પોલીસ લાઇન પાસે બની હતી. જોકે, હજુ સુધી કોઈ આતંકવાદી જૂથે વિસ્ફોટની જવાબદારી સ્વીકારી નથી.


જીઓ ન્યૂઝે ડિસ્ટ્રિક્ટ હેડક્વાર્ટર હોસ્પિટલના એમએસ તાહિર અલી શાહને ટાંકીને જણાવ્યું હતું કે વિસ્ફોટ બાદ 50 થી વધુ ઘાયલો અને 15 મૃતદેહોને હોસ્પિટલમાં લાવવામાં આવ્યા હતા. પોલીસે જણાવ્યું હતું કે ઘાયલોમાં મોટાભાગના નમાઝ પઢનારા હતા. તેમણે એમ પણ કહ્યું હતું કે વિસ્ફોટથી મસ્જિદની બહાર ખાડો પડી ગયો હતો.

રેસ્ક્યુ 1122 ખૈબર પખ્તુનખ્વાના પ્રવક્તા બિલાલ અહમદ ફૈઝીના જણાવ્યા અનુસાર, સમાચાર મળતાં જ બચાવ ટીમો ઘટનાસ્થળે પહોંચી ગઈ હતી અને બચાવ કામગીરી શરૂ કરી હતી. તેમણે વધુમાં જણાવ્યું હતું કે ઘણા લોકો ઘાયલ થયા છે અને તેમને પ્રાથમિક સારવાર માટે નજીકની હોસ્પિટલોમાં લઈ જવામાં આવી રહ્યા છે. બચાવ ટીમો ઘટનાસ્થળે હાજર છે અને પરિસ્થિતિનું મૂલ્યાંકન કરી રહી છે.