મણિપુરમાં ફરી હિંસા ભડકી, ખેતરમાં કામ કરી રહેલા ખેડૂતની ગોળી મારીને હત્યા

મણિપુરના કાંગપોકપી જિલ્લાના ગોવાનજાંગ ગામમાં શનિવારે સશસ્ત્ર માણસોએ 53 વર્ષીય એક વ્યક્તિની હત્યા કરી દીધી. મૃતકની ઓળખ ખેડૂત હાઓલાલ સિંગસિત તરીકે થઈ છે. પોલીસના જણાવ્યા અનુસાર, આ ઘટના શનિવારે સાંજે 5:30 વાગ્યે ચલવાહ પોલીસ સ્ટેશનના અધિકારક્ષેત્રમાં ઇમ્ફાલ-તામેંગલોંગ (આઇટી) રોડ પર આવેલા ગોવાનજાંગ ગામમાં બની હતી. હુમલા સમયે ખેડૂત તેની પત્ની સાથે ડાંગરના ખેતરમાં કામ કરી રહ્યો હતો.

પોલીસના જણાવ્યા મુજબ, તેની પત્ની હુમલાના સ્થળેથી ભાગી ગઈ હતી, પરંતુ હાઓલાલને અનેક ગોળી વાગી હતી અને તેનું મૃત્યુ થયું હતું. પોલીસે મૃતદેહને કબજે કર્યો હતો અને તેને કાંગપોકપી જિલ્લા હોસ્પિટલમાં લઈ ગયો હતો. વધુ તપાસ માટે સંબંધિત પોલીસ સ્ટેશનમાં કેસ નોંધવામાં આવ્યો છે. અધિકારીઓએ જણાવ્યું હતું કે ગુનામાં કોણ સામેલ હતું તે હજુ સુધી જાણી શકાયું નથી, અને ગુનેગારોને પકડવા માટે તપાસ ચાલી રહી છે.

13 મેના રોજ બે અલગ-અલગ હુમલામાં ચાર લોકો (ત્રણ ચર્ચના નેતાઓ અને એક નાગા વ્યક્તિ સહિત) માર્યા ગયા બાદ આ વિસ્તારમાં તણાવ વધી ગયો હતો. ત્યારબાદ, કુકી-ઝો જૂથે કાંગપોક્પી જિલ્લાના લિલોન વૈફેઈમાં 20 નાગા લોકોનું અપહરણ કર્યું, જ્યારે નાગા જૂથોએ સેનાપતિ જિલ્લામાં 28 કુકી લોકોને બંધક બનાવીને બદલો લીધો હતો.

બાદમાં, 15 મેના રોજ, બંને પક્ષના 14 લોકોને મુક્ત કરવામાં આવ્યા. હતા 9 જૂનના રોજ, નાગા જૂથે કુકી જૂથ દ્વારા બંધક બનાવવામાં આવેલા છ નાગા બંધકોને મુક્ત કરવાના બદલામાં 14 વધુ કુકી બંધકોને મુક્ત કર્યા. જોકે, 10 જૂનના રોજ, છ નાગા બંધકોના વિકૃત મૃતદેહ કાંગપોકપી જિલ્લાના ખારમ વાઇફેઇ, લિલોન વાઇફેઇ નજીક મળી આવ્યા હતા.