મહેસાણા નગરપાલિકાની કામગીરી વધુ એક વખત વિવાદોના ઘેરામાં આવી છે. શહેરના રાધનપુર રોડ પર માત્ર ત્રણ મહિના પહેલાં જ લાખો રૂપિયાના ખર્ચે બનાવવામાં આવેલા રોડ ડિવાઈડરોને અચાનક તોડી પાડવાની કામગીરી શરૂ કરવામાં આવી છે. વિકાસના નામે કરાયેલા આ કથિત આયોજનમાં નવા બનાવેલા ડિવાઈડરની સાથે ઉછેરવામાં આવેલા વૃક્ષોનો પણ નાશ કરવામાં આવતા સ્થાનિક લોકો અને વિપક્ષમાં ભારે રોષ જોવા મળી રહ્યો છે.
આ મુદ્દે મહેસાણા જિલ્લા મહિલા કોંગ્રેસ સમિતિએ શાસકોની નીતિ સામે ભ્રષ્ટાચારના ગંભીર આક્ષેપો કર્યા છે. મહિલા કોંગ્રેસ પ્રમુખ ડૉ. મેઘા પટેલે સવાલ ઉઠાવ્યો છે કે આટલા ટૂંકા સમયગાળામાં જ કરોડો રૂપિયાના ખર્ચે ઊભી કરાયેલી સરકારી સંપત્તિને તોડીને ફરીથી નવા ડિવાઈડર બનાવવાની નોબત કેમ આવી? તેમણે આક્ષેપ કર્યો છે કે નગરપાલિકા દ્વારા પ્રજા પાસેથી બેવડો ટેક્સ વસૂલીને તેમના પરસેવાની કમાણીનો આ રીતે બેફામ વેડફાટ કરવામાં આવી રહ્યો છે, જે બિલકુલ ચલાવી શકાય નહીં.
પ્રજાના નાણાંના થઈ રહેલા આ ખુલ્લા દુરુપયોગ સામે કોંગ્રેસે લાલ આંખ કરી છે. ડૉ. મેઘા પટેલે નગરપાલિકા પ્રશાસન પાસે માંગ કરી છે કે આ બિનજરૂરી ખર્ચ અને નવા બનેલા ડિવાઈડર તોડવા પાછળનું સાચું કારણ સત્તાવાર રીતે જાહેર કરવામાં આવે. જો પાલિકા તંત્ર દ્વારા આ મામલે સંતોષકારક ખુલાસો કરવામાં નહીં આવે, તો આગામી દિવસોમાં પ્રજાના હિતમાં ગાંધી ચિંધ્યા માર્ગે ઉગ્ર આંદોલન કરવાની ચીમકી પણ તેમણે ઉચ્ચારી છે.
