રામલીલામાં મંદોદરીનો રોલ પૂનમ પાંડે નહીં ભજવે; વિવાદ બાદ સમિતિએ પત્ર લખીને કહ્યું - અમને માફ કરો

પૂનમ પાંડે લવકુશ રામલીલામાં મંદોદરીની ભૂમિકા ભજવી શકશે નહીં. આજે લવકુશ રામલીલા સમિતિએ આ નિર્ણય લીધો છે અને આ અંગે સમિતિએ પૂનમ પાંડેને પત્ર લખ્યો છે. પૂનમ પાંડે દિલ્હીમાં યોજાનારી ભવ્ય લવકુશ રામલીલામાં મંદોદરીની ભૂમિકા ભજવવાની હતી. જ્યારથી મંદોદરીની ભૂમિકા માટે તેમનું નામ નક્કી થયું ત્યારથી આ નિર્ણયનો ભારે વિરોધ થઈ રહ્યો હતો, આખરે વિરોધને ધ્યાનમાં રાખીને, લવકુશ રામલીલા સમિતિએ આખરે તેમને દૂર કરવાનું યોગ્ય માન્યું અને પૂનમ પાંડેને પત્ર લખીને આ અંગે જાણ કરી. સમિતિના પ્રમુખ અર્જુન કુમાર અને મહામંત્રી સુભાષ ગોયલે જણાવ્યું હતું કે સમિતિના આમંત્રણ પર પૂનમ પાંડે મંદોદરીની ભૂમિકા ભજવવા માટે સંમત થયા હતા. જોકે, તેમના નામની જાહેરાત થયા પછી, ઘણી સંસ્થાઓ અને જૂથો તરફથી વાંધો ઉઠાવવામાં આવ્યો હતો, જેના કારણે રામલીલાના ભગવાન શ્રી રામનો સંદેશ સમાજ સુધી પહોંચાડવાના ઉદ્દેશ્યમાં અવરોધ ઉભો થયો હતો. તેથી, વ્યાપક વિચાર-વિમર્શ પછી, સમિતિએ સર્વાનુમતે નિર્ણય લીધો કે આ વર્ષે, મંદોદરીની ભૂમિકા અન્ય કલાકાર દ્વારા ભજવવામાં આવશે. સમિતિએ પૂનમ પાંડેને ઉજ્જવળ ભવિષ્યની શુભેચ્છા પાઠવી અને કહ્યું કે તેઓ આ નિર્ણયને સમજીને માફ કરશે.