મહુઆ મોઇત્રાનું અમિત શાહ વિશે વિવાદાસ્પદ નિવેદન; ફરિયાદ દાખલ

પશ્ચિમ બંગાળમાં મમતા બેનર્જીની પાર્ટીના સાંસદ મહુઆ મોઇત્રાએ ભાષાની મર્યાદા ઓળંગી છે. મહુઆ મોઇત્રાએ કહ્યું છે કે જો ગૃહમંત્રી અમિત શાહ બાંગ્લાદેશી ઘૂસણખોરી રોકી શકતા નથી, તો તેમનું માથું કાપીને વડાપ્રધાનના ટેબલ પર મૂકવું જોઈએ. આ નિવેદન બાદ મહુઆ મોઇત્રા વિરુદ્ધ કૃષ્ણનગર કોતવાલી પોલીસ સ્ટેશનમાં ફરિયાદ દાખલ કરવામાં આવી છે. ભાજપ બંગાળમાં મતદાર યાદીમાં સુધારો કરવાની પણ માંગ કરી રહી છે. દેશમાંથી ઘૂસણખોરોને બહાર કાઢવાની વાત થઈ રહી છે. એટલા માટે મહુઆ મોઇત્રાએ કહ્યું કે જે લોકો વારંવાર ઘૂસણખોરોનો મુદ્દો ઉઠાવે છે તેમણે આ પ્રશ્ન દેશના ગૃહમંત્રીને પૂછવો જોઈએ, કારણ કે ઘૂસણખોરી રોકવાની જવાબદારી ગૃહ મંત્રાલયની છે. મહુઆએ કહ્યું કે ગૃહમંત્રી તરીકે અમિત શાહ ઘૂસણખોરી રોકવામાં નિષ્ફળ રહ્યા છે. તેથી, ગૃહમંત્રીનું માથું કાપીને વડાપ્રધાનના ટેબલ પર મૂકવું જોઈએ મામલો વધુ વકરી ગયા બાદ, તૃણમૂલ કોંગ્રેસે સમગ્ર મુદ્દા પર સ્પષ્ટતા કરી. તૃણમૂલ કોંગ્રેસના નેતા કુણાલ ઘોષે કહ્યું કે મહુઆ મોઇત્રાએ પોતાનો મુદ્દો પ્રતીકાત્મક રીતે કહ્યું છે. તેમનો હેતુ અમિત શાહને કોઈ શારીરિક નુકસાન પહોંચાડવાનો નહોતો. તેથી, તેમના નિવેદનનો બીજો કોઈ અર્થ કાઢવો જોઈએ નહીં.